Մայիսի 6-ին Հայաստանում պետք է տեղի ունենա իշխանափոխություն. Նիկոլ Փաշինյան

Թալինում այսօր Հայ ազգային կոնգրեսի նախընտրական հանդիպումների ժամանակ Նիկոլ Փաշինյանն իր ելույթում հավաքվածներին կրկին հիշեցրեր երեսուն վայրկյանանոց հեղափոխության մասին:

«2012 թվականի մայիսի 6-ին ՀՀ-ում պետք է տեղի ունենա իշխանափոխություն: Այդ իշխանափոխության արդյունքում Սերժ Սարգսյանը և իր հանցախումբը պետք է հեռանան իշխանությունից և հետագայում հայտնվեն մեղադրյալի ու անբաստանյալի կարգավիճակում, իսկ ՀՀ-ում իշխանության կարգավիճակում պետք է հայտնվի ՀՀ քաղաքացին: ՀՀ Սահմանադրության երկրորդ հոդվածն ասում է. Հայաստանում իշխանությունը պատկանում է ժողովրդին, ժողովուրդն իր իշխանությունը իրացնում է ազատ ընտրությունների միջոցով: Սա նշանակում է, որ ազատ ընտրությունը միակ երաշխիքն է, որ ՀՀ-ում կապահովվի զարգացման հեռանկար, որովհետև միայն ազատ ընտրությամբ ձևավորված իշխանությունը կծառայի ժողովրդին: Իշխանությունը ծառայում է նրան, ում պարտական է իշխանություն լինելու համար»:

Նիկոլ Փաշինյանը կոչ ուղղեց նաև ոստիկաններին, զինծառայողներին՝ ասելով. «Մայիսի վեցին դուք լինելու եք ոչ թե ոստիկան, ոչ միայն ոստիկան, այլ ունենալու եք ավելի բարձր կարգավիճակ՝ Հայաստանի Հանրապետության քաղաքացու կարգավիճակ: Ոստիկաննե՛ր, զինծառայողնե՛ր, հարկայինի աշխատողնե՛ր, կաշկանդվածնե՛ր, մտաք ընտրական տեղամաս, ստացաք քվեաթերթիկը, հիշե՛ք երեսուն վայրկյանանոց հեղափոխության մասին, վերցրեցի՛ք քվեաթերթիկը, մտա՛ք քվեախուց, քվեարկեցի՛ք ՀԱԿ-ի օգտին, քվեաթերթիկը գցեցի՛ք քվեատուփը և արեցիք ձեր բաժին հեղափոխությունը, երեսուն վայրկյանանոց հեղափոխությունը և մի մեծ անկյունաքար դրեցիք ազատ և երջանիկ Հայաստանի շենքին: Ես հույս ունեմ, ես համոզված եմ, որ մայիսի վեցի երեկոյան մենք բացելու ենք քվեատուփերը և տեսնելու ենք, որ Սերժիկ Սարգսյանի Հանրապետական կուսակցությունից մնացել են այն ձվերը, որ նրանք բաժանել են ապրիլ ամսին: Ուրեմն՝ հաղթանա՛կ բոլորիս ու պայքար մինչև վերջ»: