"The New York Times". Տեխասի նահանգապետը ձախողել է նախընտրական բանավեճը

ԱՄՆ նախագահի Հանրապետական թեկնածու, Տեխասի նահանգապետ Ռիք Փերին նոյեմբերի 9-ին ամերիկյան "CNBC" հեռուստատեսության ուղիղ եթերում ընթացող Հանրապետական մյուս թեկնածուների հետ բանավեճի ժամանակ հայտնվել է, մեղմ ասած՝ տհաճ իրավիճակում։

Ռիք Փերին բանավեճի ժամանակ հայտարարել է, որ իր նախընտրական ծրագրիրը հիմնականում ուղղված է երեք պետական ոլորտներին։ Սակայն նախագահի հանրապետական թեկնածուն կարողացել է նշել միայն երկու ոլորտները՝ կրթության և առևտրի։ Մեկ րոպե հապաղելուց հետո՝ Փերին հայտնել է, որ երրորդ ոլորտը չի կարողանում հիշել։ «Ես ցավում եմ, վայ...», - ասել է նա։ Փերիի անհաջող ելույթը ուղեկցվել է դահլիճում գտնվող հանդիսատեսի ժպիտով և բանավեճի մասնակիցների խորհուրդներով։ Մի քանի րոպե անց, երբ Փերիին կրկին խոսք է տրվել, վերջինս այդ ժամանակ ասել է, որ նկատի ուներ Էներգետիկ գործակալությանը։

Ըստ բազմաթիվ վերլուծաբանների՝ այս անհաջող բանավեճը կարող է մեծ վնաս հասցնել Ռիք Փերիի վարկանիշի վրա՝ մասնավորապես այն պատճառով, որ նախորդ բանավեճերի ժամանակ էլ առանձնապես հաջող ելույթներ չի ունեցել։ Այժմ մի շարք վերլուծաբաններ կարծում են, որ ԱՄՆ Հանրապետական ​​կուսակցության նախընտրական շտաբը կդադարեցնի Ռիք Փերիի նաընտրական կամպանիայի ֆինանսավորումը, և նախկին նահանգապետի այդ ձախողումը նրան կենթարկի «քաղաքական մահվան»։

Բանավեճին մասնակցել են նախագահի պաշտոնին հավակնող ութ թեկնածուներ։ Վերջին հարցումների համաձայն՝ հանրապետական թեկնածուներից ամենահայտնին գործարար Հերման Քեյնն է, ում աջակցում է ամերիկացիների 23%-ը և Մասաչուսեթս նահանգի նախկին նահանգապետ Միթ Ռուննին, ում աջակցում է  հարցման մասնակիցների 24%-ը։

Հանրապետական թեկնածուների բանավեճերը կշարունակվեն մինչև 2012 թ.–ի մարտ ամիսը։

Հիշեցնենք, որ ԱՄՆ նախագահական ընտրությունները տեղի կունենան 2012 թ.–ի նոյեմբերին։