Ինձ համար անհասկանալի է, թե ինչպես են իշխանական կոալիցիայից ուժերն անցնում ընդդիմություն. Անուշ Սեդրակյան

««Ժառանգություն»-ն ու «Ազատ դեմոկրատներ»-ը հստակ պահպանել են իրենց քաղաքական վեկտորները և քաղաքական պլատֆորմը: Թե՛ «Ազատ դեմոկրատներ»-ն իրենց լիբերալ գաղափարախոսությամբ, թե՛ «Ժառանգություն»-ն իր գաղափարախոսությամբ քաղաքականապես ըմբռնելի են», - այս մասին «Ազատ դեմոկրատներ» կուսակցության փոխնախագահ Անուշ Սեդրակյանն ասաց Հայկական երկրորդ հեռուստաալիքով հեռարձակվող «Խոսքի իրավունք» հաղորդման ժամանակ՝ հավելելով, որ այդ քաղաքական ուժերը քաղաքականապես հստակ գծագրված պլատֆորմ ունեն:

«Ինչ վերաբերում է այս քաղաքական գործընթացում ընթացող այլ գործընթացների, ինձ համար որոշ բաներ տարակուսանք են առաջացնում: Առաջին հերթին տարակուսելի է ընդդիմություն-իշխանությունից կատարվող այդ հսկայական տեղաշարժերը, ընդ որում՝ այն տեղաշարժերը, որոնք կատարվում են հաշված ամիսների ընթացքում: Որպես կանոն, եթե ընդդիմադիր ուժը պետք է գա դեպի ընդդիմադիր ուղի, նա պետք է անցնի շատ երկար և շատ չարչարած ճանապարհ: Ընդդիմադիր ուժը պետք է մի կողմ դնի բոլոր իշխանական լծակները, նա պետք է հայտարարի ընդդիմադիր պլատֆորմի մասին և այդ ամենը պետք է արվի ընտրություններից շատ և շատ առաջ: Ինձ համար անհասկանալի է, թե ինչպես են իշխանական կոալիցիայից ուժերն անցնում ընդդիմություն, կոնկրետ ես ԲՀԿ-ի մասին կարող եմ ասել, ժամանակին այդ ճանապարհն անցավ ՀՅԴ-ն, ՕԵԿ-ն էլ կրկնեց այդ ճանապարհը: Նորմալ է, երբ իշխանություններից ուժը գնում է ընդդիմություն, բայց նորմալ չէ, եթե այդ դեպքում ինքը պահպանում է իր իշխանական լծակները և նորմալ չէ, եթե այդ դեպքում չի փոխվում նրա պլատֆորմը: Մեզ մոտ ընդդիմությունը, որպես կանոն, քննադատող ուժն է: Մեզ մոտ, բոլոր հայերիս թվում է, որ ընդդիմությունը դա այն է, որ ամենից շատ գոռում է և ամենից վատ բաներն է գոռում, բայց իրականում ընդդիմությունն այն է, որ տալիս է իշխանությունից տարբեր լուծումներ:

Հայտարարելը կոնկրետ, որ դու ընդդիմություն ես, թե՝ ոչ՝ բավականաչափ նուրբ հարց է, որովհետև ԲՀԿ-ում կատարվում է այսպես կոչված երկատում, երբ մի մասն արտահայտում է մեկ կարծիք, իսկ պրն. Օսկանյանն արտահայտում է շատ ռադիկալ կարծիքներ, ավելի ռադիկալ քան նախկինում ՀԱԿ-ի լիդեր Լևոն Տեր-Պետրոսյանը և այս պարագայում, որոշակի առումով, այդ ուժին վերագրում է ընդդիմադիր կեցվածք, որովհետև, եթե դու անցնում ես իշխանական ուղի և անում ես քարոզչություն, դու պետք է նաև հաշվի առնես, որ դու մասնակցություն ես ունեցել այդ իշխանական գործընթացում և քո մասնակցությունը բերել է ոչ այնքան լավ հետևանքների, քանզի մենք գիտենք, որ այս իշխանավորման հետևանքով Հայաստանի սոցիալական վիճակը, մեղմ ասած, վատթարացել է և առաջին հերթին, թե ընդդիմադիր ուժերը և թե ինչու ոչ նաև իշխանական ուժերը պետք է փնտրեն արմատները և տան լուծումները: Ցավոք, այս քարոզարշավի ընթացքում շատ մեղմ են անդրադառնում Հայաստանի իրական խնդիրներին»,- նշեց Անուշ Սեդրակյանը: