Քվեախցիկին մոտենալիս Աստծու և Ձեր խղճի առջև եղեք հաշտ, համերաշխ. Գագիկ Ջհանգիրյան

Այսօր Թալինում տեղի ունեցած ՀԱԿ հանրահավաքում նախկին զինդատախազ Գագիկ Ջհանգիրյանը, հիշելով տարիներ առաջ Թալինում կատարված դեպքերը, նշեց, որ մեր երկրի դատական և իրավական համակարգի կործանումը սկսվել է հենց Թալինի դեպքերից:

«Հայտնի Սաքոյի պռովոկացիայից հետո, երբ տուժողը դարձավ մեղադրյալ, իսկ մեղադրյալը դարձավ վկա, այդ օրվանից սկսած մեր երկրում դադարեց գոյություն ունենալ դատական իշխանությունը»,- նշեց Ջհանգիրյանը և հավելեց, որ անցած 4 տարիների ընթացքում կառավարությունը շարունակել է իր այդ գործելաոճը:

«Մեզանից յուրաքանչյուրին՝ 100-ից ավել քաղբանտարկյալներ ենք եղել, կեղծ, շինծու մեղադրանքներով դատել են: Տարիներ, ամիսներ անցկացրել ենք ազատազրկման վայրերում, բայց ես մի բան ասեմ, եթե իրենց նպատակը մեզ վախեցնելն էր, մեզ շարժումից ետ պահելն էր, պիտի խոստովանեմ, որ դա նրանց բացարձակ չի հաջողվել: Այստեղ ենք ես, Նիկոլը, Մյասնիկը, Սմբատը, Սասունը մեր հետ է, Հակոբը մեր հետ է, բոլոր տղաները մեր հետ են»,-ասաց զինդատախազը:

Իր ելույթում անդրադառնալով երկրում տիրող վախի մթնոլորտին՝ Ջհանգիրյանն ասաց, որ անգամ ոստիկանները, հարկայինը, մաքսայինը, գյուղապետերը, նրանք, ովքեր հորդորում կամ ստիպում են իրենց ձայնը տալ այս ռեժիմին, հենց այս ռեժիմի գերին են:

«Իրենց էլ են ճնշում, իրենք էլ են այս ռեժիմի գերին: Իրենք էլ են ընկել կրակը, չգիտեն ինչ անեն, որովհետև իրենց վրա էլ է պլան դրած: Ամեն քրեականի պետի, քրեականի տեսուչի, թաղայինի վրա պլան է դրած. եթե այսքան ձայն չբերես, քո պաշտոնից կզրկվես»,- ասաց Գագիկ Ջհանգիրյանը և թալինցիներին խնդրեց չվախենալ, չենթարկվել հորդորներին:

«Մի ենթարկվեք հորդորներին, վախին, ճնշմանը, այլ քվեարկե՛ք ի սրտե, քվեարկե՛ք մաքուր, քվեարկե՛ք ազատ, ա՛յ ոնց գնում եք եկեղեցի, ա՛յ այդպես քվեախցիկին մոտենալիս Աստծու և Ձեր խղճի առջև եղեք հաշտ, համերաշխ»,-ասաց Ջհանգիրյանը՝ վերջում հավելելով նաև, որ եթե թալինցիները չընտրեն Թալինում մեծամասական ընտրակարգով առաջադրված Մկրտիչ Սափեյանին, այլ ընտրեն ցանկացած այլ թեկնածուի, այդ դեպքում ԱԺ նրանք ուղարկելու են միայն կոճակ սեղմողի, և ոչ ավելին: Իսկ ըստ Ջհանգիրյանի՝ այդ բոլոր կոճակ սեղմողների կոճակներն էլ մի տեղում են՝ նախագահականում: Այնտեղից սեղմում են մեծ կոճակը, իսկ ԱԺ-ում էլ ամեն մեկն իր փոքր կոճակն է սեղմում: