Մեզ մոտ գեներալներն ավելի շատ են, քան զինվորները. Հրանտ Բագրատյան

Թալինում այսօր տեղի ունեցած ՀԱԿ հանրահավաքում նախկին վարչապետ Հրանտ Բագրատյանը կրկին անդրադարձավ ՀՀԿ նախընտրական ծրագրի 14 կետերի, որոցից ոչ մեկը ի կատար չի ածվել։

«Հիմա այդ մարդը շրջում է հանրապետությունով մեկ և ասում է՝ ինձ ձայն տվեք։ Բայց եկեք մի պահ մտածենք, թե ինչու՞ իրան ձայն տանք», – Սերժ Սարգսյանի նախընտրական կոչերին անդրադարձավ նախկին վարչապետը։

Նրա համար անհասկանալի է, թե ինչպես ՀՀԿ առաջնորդը կարող է ընտրողների ձայները խնդրել, երբ երկրում աճել է արտագաղթի և ինքնասպանությունների թիվը։ 

«Մենք ունենք 82 գեներալ, հիմա մեզ մոտ գեներալները երևի ավելի շատ են, քան զինվորները։ Մեզ մոտ արդեն աշխատող էլ չկա, մեզ արդեն կամաց–կամաց սովորեցնում են, որ պետք է էլ չի աշխատել, մի չորս հատ երեխա ունեցեք, երեքին ուղարկեք Ռուսաստան, փող կուղարկեն, ձեր ձեռքը փող կլինի, մենք էլ ապրանք կբերենք, ձեզ կծախենք, այդ փողը ձեռներիցդ կառնենք, հետո դուրս կտանենք արտասահման», – նշեց Բագրատյանը՝ համոզմունք հայտնելով, որ այդպիսի մոդելը երկիրը տանում է կործանման։

«Այս երկրում անցնում է միայն փողը, ուժը, թքած ունեն ինտելեկտի վրա, թքած ունեն գիտելիքի վրա, թքած ունեն գաղափարի վրա, թքած ունեն պարկեշտության վրա։ Եթե մի ուժ էլ դուրս է գալիս, փորձում են ձերբակալել, վարկաբեկել, մարդկանց վախեցնել։ Մտավորականություն ընդհանրապես չի մնացել, բոլորը քծնող, բոլորը փորձում են ինչ–որ աշխատանք ստանալ», – իր վրդովմունքը հայտնեց Բագրատյանը՝ ցավով նկատելով, որ շատ սովորական է դարձել դավաճանելը, երեկվա թշնամու կողքին կանգնելը։