«Հայկական ժամանակ». Սերժ Սարգսյանի թիկնապահները փակել են հայտնի Փառանձեմ մայրիկի բերանը

Շատերին հայտնի Փառանձեմ մայրիկը՝ Արցախյան ազատամարտի առաջին զոհի՝ Էդիկ Տոռոզյանի մայրը, թերթի թղթակցի հետ զրույցում երեկ պատմել է, թե ինչպես են Սերժ Սարգսյանի անվտանգությունն ապահովող աշխատակիցները փակել իր բերանը' թույլ չտալով որևէ բան խոսել: Ապրիլի 30-ին Սերժ Սարգսյանը հանդիպում է անցկացրել Նոր Հաճընի բնակիչների հետ: Դրանից առաջ երկու հոգի այցելել է այդ քաղաքում ապրող Փառանձեմ մայրիկին, հորդորել՝ չներկայանալ հանդիպմանը: Մերժում ստանալով' հետաքրքրվել են, թե Փառանձեմ մայրիկն ի՞նչ է մտադիր ասել Սերժ Սարգսյանին: ճանաչելով նրան, երևի չեն կասկածել, որ ընդդիմադիր ու համարձակ կինը Սերժ Սարգսյանին ասելու բան կունենա:

«Ասացի' պետք է ասեմ' Բելգիայում ապրող Ասլանյան եղբայրները մոտ քսան տարի առաջ Նոր Գեղիում ադամանդի գործարան էին սարքել: Մեկ-երկու տարի աոաջ գործարանը փակվել է: 400 աշխատողներն անգործ են մնացել ու թողնում են Հայաստանը, գնում: Այդ գործարանն էլ փակել է ինքը' Սերժ Սարգսյանը: Պահանջելով՝ եկամտի 50 տոկոսը կտաք, կաշխատեք: Մի ամիս տվել են ու էլ չեն կարողացել»,- թերթի թղթակցին պատմել է Փառանձեմ մայրիկը:

Նրա խոսքով, Սերժ Սարգսյանի հետ հանդիպման Ժամանակ ինքը հենց ցանկացել է խոսել, նրա թիկնապահներն ամեն անգամ բերանը փակել են:

«Ես էլ իրենց բերաններին էի խփում»,- ասել է 85-ն անց կինը: Այս անգամ նրան նաև չի հաջողվել այրել Սերժ Սարգսյանի ու Ռոբերտ Քոչարյանի նկարները, ինչը հաճախ անում է հրապարակային միջոցառումների ժամանակ: Փառանձեմ մայրիկը դրանք ուղղակի պատռել է: