«Չորրորդ ինքնիշխանություն». Բենզին Ռուբոն ՕԵԿ-ից է, բայց թաքուն է պահում այդ հանգամանքը

Թիվ 12 ընտրատարածքում ՕԵԿ-ն առաջադրել է Ռուբեն Մասումյանի՝ Բենզին Ռուբոյի թեկնածությունը: Բենզին Ռուբոն իր քարոզչական բուկլետներում չի հիշատակել ՕԵԿ-ի մասին, և հիմա նա քարոզչություն է իրականացնում այդ տարածքի ընտրողներին խաբելով, թե ինքն անկուսակցական է: «ՉԻ»-ն հիշեցնում է, որ Բենզին Ռուբոն ոչ վաղ անցյալում եղել է ԲՀԿ Շենգավիթի տարածքային կառույցի ղեկավարը, որին, սակայն, Գագիկ Ծառուկյանը հեռացրել է զբաղեցրած պաշտոնից և կուսակցության շարքերից: Դրանից հետո Բենզին Ռուբոն քաղաքական ապաստան է գտել ՕԵԿ տանիքի ներքո, որն էլ նրան մեծամասնական ընտրակարգով առաջադրել է այդ համայնքում: Նրա մերձավոր շրջապատում կատակում են՝ ասելով, թե Մասումյանն իր բուկլետում չի գրել կուսակցական պատկանելության մասին, քանի որ վստահ չի եղել իր վրա, թե կարող է գոնե մեկ ամիս լինել մի կուսակցության անդամ:

«ՉԻ»-ն ավելացնում է նաև, որ Բենզին Ռուբոն այս օրերին բանակցությունների մեջ է մտել ՀՀԿ-ական ժեկի պետերի հետ՝ նրանց գումար առաջարկելով այն բանի դիմաց, որ վերջիններս մտնեն ինչ-որ շենքեր և ձեռքի հետ ակնարկեն, թե իբր Հանրապետականը որոշել է «աշխատել» իր համար: Բենզին Ռուբոյի այս ինքնագործունեության արդյունքում ժեկերի որոշ պատասխանատուներ պրոբլեմ են ունեցել ՀՀԿ շտաբների պատասխանատուների հետ: Եղել են դեպքեր, որ նրանցից աշխատանքից ազատվելու դիմումներ են պահանջել՝ միաժամանակ վերցնելով այն գումարը, որը Մասումյանը տվել է վերջիններին ծառայության դիմաց: