ՊՆ քննչական ծառայությունը բանակի միջադեպերի առնչությամբ դեռևս հրապարակումներ չի անում

Վերջին շրջանում բանակում տեղի ունեցած ողբերգական երեք միջադեպերի առնչությամբ ՊՆ քննչական ծառայությունն առայժմ որևէ տեղեկություններ չի հայտնում, նախաքննության շահերից ելնելով: Այս մասին Լուրեր.com-ի հետ զրույցում ասաց ՀՀ ՊՆ քննչական ծառայության սպա Մերի Սարգսյանը:

Հիշեցնենք, որ ապրիլի 18-ին Տավուշի մարզի Չինարի և Այգեձոր գյուղերի մոտակայքում տեղակայված «Մեհրաբներ» զորամասի «Խուբան» հենակետում տեղի ունեցած միջադեպի հետևանքով, դեռևս չհաստատված վարկածի, հակառակորդի կրակոցից զոհվել էր մեկ ժամկետային զինծառայող և մեկը վիրավորվել էր: Մյուս դեպքը, երբ Տավուշի մարզի Այգեպար-Մովսես գյուղերի միջև ընկած ճանապարահատվածում ՀՀ ՊՆ N զորամասի պայմանագրային զինծառայողներից մեկին պատկանող «ՎԱԶ 2107» մակնիշի ավտոմեքենայով երթևեկելիս հրազենային մարմնական վնասվածքներ են ստացել վարորդը և ևս երկու պայմանագրային զինծառայողներ, որի հետևանքով նրանք մահացել են:

Հիշեցնենք նաև, որ Այգեպար և Մովսես գյուղերի մոտ երեք հայ պայմանագրային զինծառայողների սպանության միակ ականատես՝ Բերդի 27-ամյա բնակիչ Արկադի Եսայանն իր տեսածն ամբողջությամբ արդեն պատմել է քննչական մարմնին, սակայն թերթերից մեկի հետ զրույցում հրաժարվել էր մանրամասնել, պատճառաբանելով, որ դրա իրավունքը չունի, սակայն հավասստիացրել էր, որ հայ զինվորների համար մեղավոր են ադրբեջանցիները.

«էտ հաստատ ադրբեջանցիներ են եղել, մնացածը ասեկոսեներ են»,-ասել էր գործով միակ վկան:

Այս երկու դեպքերին հաջորդեց ևս մեկը՝ ապրիլի 27-ին ժ. 19.35-ի սահմաններում ԼՂՀ ՊԲ զորամասերից մեկի մարտական դիրքում արձանագրվել է հրազենային զենքից մահացու վիրավորման դեպք, որի արդյունքում զոհվել է նույն զորամասի ժամկետային զինծառայող շարքային Հովհաննես Մարատի Նիկողոսյանը: