Էրդողանը «բռնապետի վիժվածք է». կուսակցապետ

Թուրքիայի գլխավոր ընդդիմադիր Ժողովրդահանրապետական կուսակցության (CHP) առաջնորդ Քեմալ Քըլըչդարօղլուն այդ երկրի նախագահ Ռեջեփ Թայիփ Էրդողանին «բռնապետի վիժվածք» է անվանել:

Այս մասին, ինչպես հաղորդում է «Արմենպրես»-ը' վկայակոչելով թուրքական «Ջումհուրիեթ» թերթը, Քըլըչդարօղլուն հայտարարել է CHP հերթական 35-րդ համագումարում ունեցած ելույթում քրդերի հետ խաղաղություն պահանջած 1128 գիտնականների կոչի տակ ստորագրած մտավորականների ձերբակալություններ սկսվելու առնչությամբ:

Քըլըչդարօղլուն ասել է նաև, որ Էրդողանը չի հասկանում ինչ բան է «նամուսն ու պատիվը» և «չի հասկանում դրանց իմաստը»:

Անկարայի հանրապետական գլխավոր դատախազությունն անմիջապես «նախագահին հրապարակավ վիրավորելու» մեղադրանքով հետաքննություն է սկսել Քըլըչդարօղլուի դեմ:

Թուրքիայի քրեական օրենսգրքի 299-րդ հոդվածի (վիրավորանք նախագահին) հատկանիշներով նախագահին վիրավորելու մեջ մեադրվող անձը կարող է դատապարտվել 1-4 տարվա ազատազրկման, իսկ վիրավորանքը հրապարակայնորեն հասցվելու դեպքում' պատժաչափը կարող է մեկ վեցերորդով ավելացվել: