Հանրահայտ դաշնակահարուհին հանդես կգա հայաստանյան բեմում

Մայիսի 2-ին տեղի ունեցավ Հայաստանի երիտասարդական հիմնադրամի գործադիր տնօրեն Ալեքսանդր Տեր-Հովակիմյանի, Հայաստանի պետական երիտասարդական նվագախմբի գեղարվեստական ղեկավար և գլխավոր դիրիժոր Սերգեյ Սմբատյանի և ամերիկացի հանրահայտ դաշնակահարուհի, IMG Artists, Sony Classical Artists անդամ, Astral Artist National Auditions և Classical Recording Foundation-ի կրկնակի մրցանակակիր Սիմոնե Դիներսթինի մամուլի ասուլիսը։ Բանախոսներն անդրադարձան ինչպես հիմնադրամի և Հայաստանի պետական երիտասարդական նվագախմբի համագործակցությանը, այնպես էլ այսօր «Արամ Խաչատրյան» համերգասրահում կայանալիք Սիմոնե Դիներսթինի և Հայաստանի պետական երիտասարդական նվագախմբի համատեղ համերգին:

ՀԵՀ գործադիր տնօրեն Ալեքսանդր Տեր-Հովակիմյանը, խոսելով հիմնադրամի և պետական երիտասարդական նվագախմբի հետ համագործակցության մասին, մասնավորապես նշեց, որ համատեղ գործունեությամբ կնպաստեն երիտասարդության հոգևոր և մշակութային դաստիարակությանը, երիտասարդության շրջանում երաժշտարվեստի զարգացմանը և տարածմանը, ինչպես նաև՝ երիտասարդության մշակութային ակտիվության խրախուսմանը: «Հիմնադրամը բազմաթիվ ծրագրեր է իրականացնում, և այս համագործակցությունը դիտում ենք մշակութային դաստիարակության շատ կարևոր մի բաղադրիչ։ Միավորելով ուժերը՝ մենք կփորձենք հասնել առավելագույն արդյունքի. համագործակցությունը փորձ է երիտասարդների շրջանում նոր մշակույթ, գիտելիք ձևավորելու և ճաշակ բարձրացնելու»,- նշեց Ալեքսանդր Տեր-Հովակիմյանը։

Հայաստանի պետական երիտասարդական նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը, խոսելով դաշնակահարուհի Սիմոնե Դիներսթին հետ համագործակցության մասին, նշեց, որ նրան Հայաստան հրավիրելու ծրագրեր վաղուց կային, սակայն դաշնակահարուհու ծանրաբեռնվածության պատճառով այցը չէր կայանում։ «Շատ հետաքրքիր է, որ հանրահայտ մարդիկ, գալով Հայաստան՝ համագործակցում են պետական երիտասարդական նվագախմբի հետ և հեռանում մեծ տպավորություններով։ Եվ ես հպարտ եմ, որ մենք այսօր Երևանում կլսենք Սիմոնե Դիներսթին, որը հանդես է գալիս աշխարհի լավագույն նվագախմբերի հետ»,- ասում է Սերգեյ Սմբատյանը։
Սիմոնե Դիներսթինը, պատասխանելով լրագրողների հարցին, նշեց, որ սա իր առաջին հայաստանյան այցելությունն է, և ուրախ է, որ երաժշտական լավ ավանդույթներ ունեցող երկրում է։ «Ես կարծում եմ՝ Սերգեյ Սմբատյանը շատ մեծ աշխատանք է կատարում երիտասարդների շրջանում։ Հպարտ եմ, որ աշխատում եմ Հայաստանի պետական երիտասարդական նվագախմբի հետ, և կարծում եմ՝ այդ համագործակցությունը կշարունակվի»։ Խոսելով իր առաջիկա ծրագրերի մասին՝ դաշնակահարուհին տեղեկացրեց, որ հայաստանյան համերգից հետո մեկնալու է Վիեննա, որտեղ ներկայացնելու է Մոցարտ, այնուհետև մենահամերգով հանդես կգա Ստամբուլում՝ ներկայացնելով Բախի ստեղծագործությունները, որից հետո մի շարք համերգներով ելույթ կունենա ԱՄՆ-ում։

Նշենք, որ այսօր երեկոյան «Արամ Խաչատրյան» համերգասրահում տեղի ունենալիք համերգի ընթացքում կհնչեն Վոլֆգանգ Ամադեուս Մոցարտի «Դոն Ժուան» օպերայի նախերգանքը, դաշնամուրի կոնցերտը, Միխայիլ Կոկժաևի «Նահատակներին...» ստեղծագործությունը՝ նվիրված Մեծ եղեռնի զոհերի հիշատակին, և Էդվարդ Միրզոյանի Սիմֆոնիան: