«Հայկական ժամանակ». Լիսկայի գործը՝ ՀՔԾ-ում

«Սյունիքի մարզպետ Սուրեն Խաչատրյանի՝ Լիսկայի հարցը լուրջ է: Նախօրեին գործարար Սիլվա Համբարձումյանը իր ասուլիսի ժամանակ հայատարել էր, որ իրեն պատկանող Լիճվազք-Թեյի ոսկու հանքից Սուրեն Խաչատրյանը գողացել է 102 միլիոն դրամ արժողությամբ սարքավորում, որն այժմ գտնվում է Խաչատրյանին պատկանող «Գեղվա ձոր» հանքավայրում:

ՀՀ գլխավոր դատախազության խոսնակ Սոնա Տռուզյանը մեզ հայտնեց, որ տվյալ հրապարակումը օրվա մամուլի մոնիտորինգի արդյունքում ուղարկվել է Հատուկ քննչական ծառայություն՝ մատնանշված հանգամանքները ստուգելու և օրենքով սահմանված կարգով ընթացք տալու՝ նկատի ունենալով, որ բանախոսի ներկայացրած տեղեկությունները պարունակել են հանցագործության մասին հատկանիշներ՝ կոնկրետ անունների վկայակոչմամբ: «Իսկ թե որքանով են մամուլին տրամադրված տեղեկությունները համապատասխանում իրականությանը, պարզ կդառնա ստուգման ավարտից հետո»,- ասաց Սոնա Տռուզյանը: Սակայն ամբողջ խնդիրն այն է, որ դեռևս մեկ տարի առաջ Սիլվա Համբարձումյանը «ՀԺ»-ի հետ զրույցում հայտարարել էր. «Մեր պարկերը՝ հանքաքարի ջարդիչ սարքավորումը, որն արժե 1 մլն 246 հազար դոլար, Խաչատրյան Սուրիկի մոտ է, իր հանքում: Մեր բոլոր ապրանքներով՝ գողացած, ինքը հանք է բացում: Հիմա մենք դիմել ենք դատախազություն» ( «ՀԺ», հոկտեմբեր 13, 2010թ.): Այն ժամանակ, սակայն, գործարար կնոջ սույն հայտարարությանը որևէ ընթացք չտրվեց, այն էլ այն դեպքում, երբ Սիլվա Համբարձումյանը դիմել էր դատախազություն: Հիմա հանկարծ, երբ արդեն մի քանի օր է համառորեն լուրեր են շրջում, որ Սյունիքի մարզպետ Սուրեն Խաչատրյանը պաշտոնանկ է արվելու, ՀՀ գլխավոր դատախազությունը որոշել է այս հայտարարությանը ուշադրություն դարձնել և գործն ուղարկել ՀՔԾ»,– գրում է «Հայկական ժամանակ»–ը: