«Հրապարակ». Միասնական շտաբ ստեղծելու գաղափարը նոր երևույթ չէ

Միասնական շտաբ ստեղծելու գաղափարը, պարզվում է նոր երևույթ չէ: Նման մի բան եղել է նաև 2007–ի խորհրդարանական ընտրությունների ժամանակ, սակայն գործել է այլ ֆորմատով, և գաղտնի: «Հրապարակ»–ի տեղեկություններով, այդ շտաբը կազմված է եղել ՀՀԿ-ից, ԲՀԿ-ից, ՀՅԴ-ից և ՄԱԿ-ից: Այն կազմված է եղել նշված կուսակցությունների մեկական ներկայացուցիչներից և գլխավորել է ներկայիս փոխվարչապետ Արմեն Գևորգյանը, ով այդ ժամանակ եղել է նախագահի աշխատակազմի ղեկավարը: Շտաբը ձևավորվել է ընտրություններից մեկ օր առաջ և գործել միայն ընտրությունների օրը: Նպատակը եղել է այն, որ մի տեղում հավաքագրվի սպասվելիք քվեների քանակի վերաբերյալ տեղեկատվությունը: Այսինքն, որպեսզի կուսակցություններն օպերատիվ տեղեկատվություն ստանան, թե իրենք մոտավոր ինչ քանակի ձայներ ունեն, և ըստ այդմ քայլեր ձեռնարկեն:Թերթի տեղեկություններով, շտաբում ընդգրկված կուսակցություններից այդ օպերատիվության շնորհիվ հատկապես ՄԱԿ-ն է օգտվել ժամանակից շուտ ճշգրիտ կռահելով գլխի գալիքը:

Մինչ քվեարկությունը, ըստ բաժանած գումարի, ՄԱԿ-ն իր հաշվարկներով սպասել է ավելի քան 6 տոկոս ձայն, սակայն քվեարկությունը սկսվելուն պես ընտրողների անսպասելի ակտիվ մասնակցություն է գրանցվել, ինչի հետևանքով ՄԱԿ-ի կանխատեսած քվեները փոքր թիվ են կազմել ընդհանուրի մեջ: Այս պատկերն արդեն ուրվագծվել է օրվա երկրորդ կեսին: Թեև աննախադեպ շռայլությամբ ընտրակաշառք են բաժանել, սակայն չի հաջողվել քվեների որոշիչ քանակ ապահովել: Որոշ տեղեկություններով, իրավիճակը փրկելու համար Գուրգեն Արսենյանը նույն օրը երեկոյան հանդիպել է այն ժամանակվա ԿԸՀ նախագահ Գարեգին Ազարյանին, սակայն, ասում են, Ազարյանը ոչնչով չի կարողացել օգնել Արսենյանին, թեև վերջինս ամեն ինչի պատրաստ է եղել: Թերևս այս փորձություններն էլ ստիպեցին, որ այս ընտրություններում Արսենյանը խորհրդարան մտնելու հեշտ ճանապարհ գտնի՝ «ամենակարող» ԲՀԿ-ի հովանու ներքո: