«APPLE»-ի հիմնադրին պատվավոր դոկտորի կոչում շնորհվեց

ՏՏ ոլորտում համաշխարհային ներդրման համար ՀՀ Նախագահի 2011 թ. մրցանակի դափնեկիր, «APPLE COMPUTER» կորպորացիայի համահիմնադիր Սթիվ Վոզնյակն այսօր ՀՊՃՀ-ում էր։

Ի արժևորումն տեղեկատվական և հաղորդակցման տեխնոլոգիաների ոլորտում Սթիվ Վոզնյակի համաշխարհային ակնառու ներդրման և ի նշանավորումն նրա՝ ՀՊՃՀ կատարած այցելության՝ ՀՊՃՀ Գիտական խորհրդի որոշմամբ նրան շնորհվեց ՀՊՃՀ պատվավոր դոկտորի կոչում։

ՀՊՃՀ ռեկտոր Ա. Ավետիսյանը ողջունեց հյուրին և հակիրճ ներկայացրեց ՀՊՃՀ համագործակցության ծրագրերը և ցանկություն հայտնեց այդ շարքին մոտ ապագայում ավելացնել նաև «Apple»-ի հետ համագործակցությունը։

Աթիվ Վոզնյակի կյանքն ու գործունեությունը համառոտ ներկայացնելուց հետո ՀՊՃՀ ռեկտորը շնորհավորեց նրան ՀՀ Նախագահի մրցանակին արժանանալու համար և հանձնեց նրան ՀՊՃՀ պատվավոր դոկտորի կոչում ստանալու հավաստագիր և հուշանվեր։ Ի դեպ՝ անցյալ տարի ՀՊՃՀ պատվավոր կոչում էր շնորհվել ՀՀ Նախագահի ՏՏ ոլորտում համաշխարհային ներդրման համար առաջին մրցանակակիր, «INTEL» կորպորացիայի տնօրենների խորհրդի նախկին նախագահ Քրեյգ Բարրեթին։

Արարողության եզրափակիչ մասում խոսեց Սթիվ Վոզնյակը։ Իսկապես համամարդկային նշանակության աշխատանք կատարած մարդուն բնորոշ անմիջականությամբ Վոզնյակը պատմեց, թե ինչպես է պարզապես իր սեփական համակարգիչն ունենալու ու նրա հետ իր ուզածի պես վարվելու ցանկությունն իրեն հասցրել այս արդյունքին։ Նա նշեց, որ իր համար կրկնակի պատիվ է ստանալ այդ մրցանակը մի երկրի ճարտարագիտական համալսարանից, որը նախկինում ԽՍՀՄ մաս է կազմել։

«Քչերն այսօր գիտեն այդ մասին, բայց իմ երիտասարդ տարիներին ես իմ գյուտերից շատերը կիրառել եմ Սառը պատերազմի ժամանակ ԱՄՆ-ԽՍՀՄ հաղորդակցության հեշտացման համար։ Երեկ, երբ ես հանդիպեցի Վեհափառին, հիշեցի այն տարիները, երբ տեխնոլոգիաներին հավասար ինձ ոգեշնչում էր Քրիստոսի ուսմունքը թշնամիների հետ վարվելու մասին։ Եվ ես այդպես էի վերաբերվում ԽՍՀՄ-ին այն ժամանակ»,- ասաց Սթիվ Վոզնյակը։

Սթիվ Վոզնյակն իր մրցանակը կստանա այսօր երեկոյան ՀՀ նախագահի նստավայրում, իսկ այնուհետև Երևանի Կամերային երաժշտության տանը նրա պատվին համերգ կկայանա։