Գալուստ Սահակյանն ընդունեց Իրանի արտակարգ եւ լիազոր դեսպան Սեյեդ Ալի Սաղայանին

ՀՀ Ազգային ժողովի ՀՀԿ խմբակցության ղեկավար, Հայաստան-Իրան բարեկամության խմբի ղեկավար Գալուստ Սահակյանը մայիսի 3-ին ընդունեց Հայաստանի Հանրապետությունում Իրանի Իսլամական Հանրապետության արտակարգ եւ լիազոր դեսպան Սեյեդ Ալի Սաղայանին:

Պարոն Սահակյանը բարձր գնահատեց հայ-իրանական հարաբերությունների զարգացման ու ամրապնդման գործում իրանցի դիվանագետի կատարած աշխատանքը եւ ափսոսանք հայտնեց, որ նա ավարտում է իր դիվանագիտական առաքելությունը Հայաստանում:

Իրանի դեսպանը շնորհակալություն հայտնեց իր պաշտոնավարման տարիներին հայ ժողովրդի ու իշխանությունների ցուցաբերած ջերմ վերաբերմունքի համար եւ հավաստիացրեց, որ ինքը միշտ կմնա հայ ժողովրդի բարեկամը: Նրա գնահատմամբ՝ շատ մեծ է եղել Գալուստ Սահակյանի դերակատարությունը հայ-իրանական հարաբերությունների զարգացման ու երկու երկրների միջխորհրդարանական կապերի ամրապնդման գործում:

Երկուստեք կարեւորելով հայ-իրանական տնտեսական կապերի դինամիկ առաջընթացը՝ միաժամանակ արձանագրեցին, որ այդ հարաբերությունների զարգացման, ապրանքաշրջանառության մեծացման էլ ավելի մեծ հեռանկարներ կան, որոնք պետք է օգտագործել՝ ի շահ երկու ժողովուրդների բարեկեցության: Կողմերը բարձր գնահատեցին տարածաշրջանային խաղաղությանը միտված երկու երկրների հավասարակշռված քաղաքականությունն ու ցանկացած խնդիր բանակցային ճանապարհով լուծելու ջանքերը՝ համոզմունք հայտնելով, որ այդ գործոններով են պայմանավորված տարածաշրջանի երկրների կանխատեսելի լինելն ու նրանց կայուն զարգացումը:

Հանդիպման ժամանակ քննարկվեցին նաեւ Հայաստան-Իրան միջխորհրդարանական հարաբերությունների, կրթական-մշակութային կապերի, զբոսաշրջության զարգացմանն ու տարածաշրջանային համագործակցությանն առնչվող հարցեր: