Լիարժեք աշխատեց՝ «ոչ մի ձայն հանցավոր ռեժիմին» կարգախոսը. Լևոն Զուրաբյանի ելույթը հանրահավաքում

Կեցցե այն դեմոկրատական հեղափոխությունը, որ սկսվեց 2008 թվականին եւ այսօր մտնում է վճռական փուլ: Կեցցե մեր ազատատենչ ժողովուրդը եւ կեցցեք համաժողովրդական այս ազատագրական Շարժման բոլոր մասնակիցներդ:
Այսօր, մայիսի 3-ին, Ազգային Ժողովի ընտրությունների քվեարկությունից երեք օր առաջ արձանագրում ենք, որ Հայ Ազգային Կոնգրեսի քարոզարշավի արդյունքում երկրում ձեւավորվել են հետեւյալ իրողությունները.
1. Քարոզարշավի գլխավոր նպատակը՝ արմատապես փոխել քաղաքական մթնոլորտը երկրում, ոտքի հանել ժողովրդին եւ վերադարձնել հույսը՝ ազատություն եւ արդարություն փնտրող մեր քաղաքացիներին, լուծված է: Մարդիկ արթնացել են թմբիրից եւ պատրաստ են մարտահրավեր նետել Սերժ Սարգսյանի ստրկատիրական համակարգին:
2. Լիարժեք աշխատեց՝ «ոչ մի ձայն հանցավոր ռեժիմին» կարգախոսը: Հանրապետական կուսակցությունը հայտնվել է մեկուսացման մեջ, հասարակությունը մերժում է այդ թալանչիներին եւ ընտրակեղծարարներին: Ռեժիմը արագորեն կորցնում է իր քաղաքական հենարանը:
3. Առաջին անգամ գործում է քաղաքական միասնական շտաբը, որի գլխավոր նպատակն է բոլոր մակարդակի ընտրատեղամասերում ապահովել Հայ Ազգային Կոնգրեսի, Հայ Հեղափոխական Դաշնակցության եւ Բարգավաճ Հայաստանի վստահված անձանց եւ հանձնաժողովի անդամների համագործակցությունը հանրապետական ընտրակեղծարարի ձեռքը բռնելու գործում: Այս երեք քաղաքական ուժերի տեղական կառույցների միջեւ արդեն հաստատված են աշխատանքային հարաբերություններ, մշակվում են օրինականության վերահսկման արդյունվետ մեխանիզմներ:
Սիրելի ժողովուրդ, ստեղծված են բոլոր նախադրյալները հաղթանակի համար: Մնացածը կախված է բոլորիս ակտիվությունից, վճռականությունից եւ հավատից: Մենք ունենք՞ այդ հավատը: Ունե՞նք մենք արդյոք այդ վճռականությունը: Մենք պատրա՞ստ ենք նվաճել ազատություն մեր երկրի համար:
Սա իրականում՝ հոգեւոր հեղափոխություն է: Սա իրականում պատերազմ է՝ ժողովրդավարության եւ բռնապետության միջեւ, ազատության եւ ստրկամտության, ազնվության եւ կոռումպացվածության, օրինականության եւ կրիմինալի միջեւ:
Ասածիս մեջ որեւէ չափազանցություն չկա: Այսօրվա Հայաստանում՝ գլխավոր դատախազը, Աղվան Հովսեփյանը, որը պետք է լիներ օրինականության խորհրդանիշն ու կրողը, ինչ՞ է անում: Տեսնելով, որ ձայն չունեն, որոշել են ազատազրկված մարդկանց նույնպես օգտագործել ընտրակեղծարարությւան նպատակով: Ազատ արձակման դիմաց Հայաստանի գլխավոր դատախազ Աղվան Հովսեփյանը պահանջում է ազատազարկվածներից եւ հանցագործ աշխարհի ներկայացուցիչներից ներգրավվել ընտրակեղծիքների, ինչպես նաեւ Հանրապետական կուսակցության հակառակորդների եւ ընդդիմադիրների ահաբեկման մեջ: 6-րդ ընտրատարածքում իր եղբոր հաղթանակը ապահովելու նպատակով Աղվան Հովսեփյանը օգտագործում է հանցագործ աշխարհի երեւելի դեմքերին, որ ահաբեկեն ընտրողներին, եւ եթե անհրաժեշտ լինի, նաեւ մասնակցեն ուժային ռազբորկաների: Մյուս ընտրատարածքներում սպառնում է քաղաքական հակառակորդներին քրեական հետապնդմամբ:
Ո՞ւր ենք հասել: Փաստորեն ռեժիմը անգամ ազատությունը օգտագործում է որպես ընտրակաշառք, իսկ ազատազրկումը որպես քաղաքական հետանդման միջոց: Ի՞նչ է սա նշանակում: Որեւէ ապագա ունի՞ արդյոք մի պետություն, որում օրենքի գլխավոր պահապանը հանցավոր կապի մեջ է կրիմինալ աշխարհի հետ, եւ դա խրախուսվում է պետականորեն:
Մենք սա կարո՞ղ ենք հանդուրժել: Ժամանակը չէ՞ փրկել մեր երեխաների ապագան այս հանցագործներից:
Այսօր մենք, Հայաստանի քաղաքացիներս, առաքելություն ունենք' իրականացնել Հայաստանում ժողովրդավարական հեղափոխությունը, որը կբացի Հայաստանի զարգացման, երկրում ազատության, օրինականության եւ արդարության հաստատման դուռը:
Մայիսի 6-ին բոլորս դեպի ընտրույթուններ: Կորչի բռնապետական ռեժիմը: Կեցցե ժողովրդի հաղթանակը: