«Հայկական Ժամանակ». ԸԸՀ–ն Սամվել Ալեքսանյանի դեմ Նիկոլ Փաշինյանի դիմում-բողոքը մերժեց

Թիվ 7 ընտրատարածքային ընտրական հանձնաժողովը երեկ կրկին քննարկեց 7-րդ ընտրատարածքում պատգամավորության թեկնածու Նիկոլ Փաշինյանի և նրա լիազոր ներկայացուցիչ Վահագն Հովակիմյանի դիմում-բողոքը՝ նույն ընտրատարածքում պատգամավորության թեկնածու Սամվել Ալեքսանյանի գրանցումն ուժը կորցրած ճանաչելու պահանջով դատարան դիմելու մասին:

Նույն դիմումը՝ թիվ 7 ԸԸՀ-ն մեկ անգամ արդեն քննել էր ապրիլի 27-ին և որոշել էր մերժել: Սակայն, Նիկոլ Փաշինյանի և նրա լիազոր ներկայացուցիչ Վահագն Հովակիմյանի ԿԸՀ ներկայացրած դիմում-բողոքի հիման վրա՝ այդ հանձնաժողովը անվավեր էր ճանաչել թիվ 7 ԸԸՀ-ի որոշումը և վերջինիս պարտավորեցրել մեկօրյա ժամկետում կրկին քննել նույն դիմում-բողոքը: Ուստի, ԸԸՀ-ն իբրև ԿԸՀ որոշման կատարում երեկ նույն հարցով կրկին նիստ էր հրավիրել: Սակայն, եթե առաջին անգամ թիվ 7 ԸԸՀ-ն ինչ-որ կերպ փորձել է դիմում-բողոքը մերժելու հիմնավորումներ պատրաստել, ապա այս անգամ այս նույն հանձնաժողովը նման ձևականությունների ետևից չընկավ:

Հանձնաժողովի անդամները լսեցին բոլոր փաստարկները, որոնք այն մասին էին, որ Սամվել Ալեքսանյանը թիվ 190 դպրոցում գումար է բաժանել և խոստացել է «Փարվանա» ռեստորանում իր հաշվին կազմակերպել այդ դպրոցի ավարտական դասարանների «Վերջին զանգի» արարողությունը: Դրանից հետո, հանձնաժողովը որոշեց մերժել Նիկոլ Փաշինյանի և Վահագն Հովակիմյանի դիմումը՝ չբերելով ոչ մի փաստարկ, թե ինչի հիման վրա է մերժում: Ուղղակի մերժեցին և վերջ: ԸԸՀ-ի որոշումը Նիկոլ Փաշինյանը և Վահագն Հովակիմյանը այսօր կբողոքարկեն ԿԸ հանձնաժողով, քանի որ ունեն անհերքելի փաստերի բազա: