Թուրքիայում ևս մեկ պայթյուն է տեղի ունեցել

Թուրքիայի մայրաքաղաք Անկարայում փետրվարի 17-ի երեկոյան տեղի ունեցած ահաբեկչությունից հետո ևս մեկը տեղի է ունեցել երկրի հարավ-արևելյան շրջանում: Ինչպես հաղորդում է «Արմենպրես»-ը, այս մասին տեղեկացնում է Reuters-ը՝ հենվելով իր աղբյուրների վրա:

Հաղորդվում է, որ Դիարբեքիր տանող մայրուղու վրա՝ Լիջեի մոտակայքում, պայթեցվել է ռազմական պահակախումբը: Կատարվածի հետևանքով կան վիրավորներ:

Թուրքիայի մայրաքաղաք Անկարայում փետրվարի 17-ի երեկոյան տեղի է ունեցել ահաբեկչություն, որի հետևանքով զոհերի թիվը հասել է 28-ի, վիրավորների թիվը 61-ն է: Պայթյունը տեղի է ունեցել Թուրքիայի զինված ուժերի գլխավոր շտաբից, ցամաքային, ծովային և օդային ուժերի հրամանատարության նստավայրերից, մեջլիսից, կառավարության կենտրոնական շենքից և ներքին գործերի նախարարությունից մոտավորապես 200 մետր հեռավորությամբ: Զինվորական անձնակազմին տեղափոխող ավտոբուսը կարմիր լույսի տակ կանգնած է եղել, երբ մեկ այլ ականապատված մեքենա է պայթել այդ վայրում:

Թուրքիայի հետախուզական կառույցները կատարվածի պատասխանատու են հայտարարել Քրդական բանվորական կուսակցությանը (PKK): Նրանք դեռ մեկ շաբաթ առաջ Անկարայի և Ստամբուլի անվտանգության մարմիններին տեղեկացրել էին ականապատ մեքենայով հնարավոր պայթյունի մասին: