Տեխնիկական կրթության ոլորտում` լայնածավալ և խոշոր ներդրում

ՀՀ կրթության և գիտության նախարարության՝ ի դեմս ՀՀ կրթության և գիտության նախարար Արմեն Աշոտյանի, ԱՄՆ Միջազգային զարգացման գործակալության՝ ի դեմս տնօրեն՝ Ջաթինդեր Չիմայի և Հայաստանի պետական ճարտարագիտական համալսարանի (Պոլիտեխնիկ)՝ ի դեմս ռեկտոր Արա Ավետիսյանի, վկայությամբ ՀՀ-ում Ամերիկայի Միացյալ Նահանգների դեսպան Ջոն Ա. Հեֆֆերնի, այսօր ստորագրվել է փոխըմբռնման հուշագիր՝ Հայաստանի պետական ճարտարագիտական համալսարանում «Հայաստանի ազգային ճարտարագիտական լաբորատորիա» հիմնադրելու մասին:

«Ուրախ եմ ազդարարելու ևս մեկ աննախադեպ ծրագրի մեկնարկի մասին, որը բազմաբաղադրիչ, հստակ նպատակ ունեցող գործողությունների շարք է, որի արդյունքում ամրապնդվում է նախևառաջ արդյունաբերություն-կրթություն կապը, երկրորդ՝ վերոնշյալ ծրագիրը բխում է ՀՀ կառավարության գերակայություններից՝ արդյունաբերական քաղաքականության, տեղեկատվական տեխնոլոգիաների զարգացման բնագավառներում, ինչպես նաև կրթության ոլորտում նորարարությունների, ժամանակակից լաբորատորիաների բազայի և արդյունաբերության կապի հստակ ուրվագծման տեսանկյունից: Ծրագիրը բեկումնային է տեխնիկական կրթության ոլորտում, երբ ստեղծվում է գերժամանակակից գիտաարտադրական, գիտակրթական բազա և խոշոր իրադարձություն է պետություն-մասնավոր հատված-միջազգային կազմակերպություններ համագործակցության եռանկյան շղթայում»,-նշել է նախարարը և հավելել, որ ծրագիրն իրականացվելու է երկու-երեք տարվա ընթացքում և արժենալու է շուրջ 6 մլն ամերիկյան դոլար: «Հուշագիրը ստորագրած կողմերի ֆինանսական հատկացումներով և «Նեյշոնալ ինստրումենտս» տրանսազգային կորպորացիայի տեխնիկական, մեթոդական, բովանդակային աջակցությամբ կբացվի միևնույն բովանդակության և գաղափարաբանության մեջ կառուցված շուրջ 30 լաբորատորիա, որոնք թույլ կտան ուսանողների համար ապահովել տեսական և պրակտիկ դասընթացների համակցություն, ձևավորել համապատասխան հմտություններ և կարողություններ՝ գերժամանանակից միջավայր և գերժամանակակից կրթություն ապահովելու համար”,-ընդգծել է Ա. Աշոտյանը՝ նշելով, որ վերոնշյալ ծրագիրը վերջին տարիների ամենալայնածավալ և խոշոր ներդրումն է բուհերի ենթակառուցվածքների և լաբորատոր բազայի բարելավման գործում:

Հուշագրի նպատակն է տեխնոլոգիաների և նորարարության զարգացման նպատակով ուժեղացնել Հայաստանի ճարտարագիտության ոլորտի կրթական կարողությունները և հետազոտական ներուժը՝ արդիականացնելով ՀՊՃՀ կրթական և հետազոտական կառույցները՝ համաշխարհային ստանդարտներին համապատասխան: Հայկական ազգային ճարտարագիտական լաբորատորիան կընդգրկի ՀՊՃՀ վեց հիմնական ուղղություները ներկայացնող լաբորատորիաներ, այն է՝ ռադիոճարտարագիտություն և հաղորդակցության համակարգեր, կիբերնետիկա, էներգետիկա, էլեկտրաճարտարագիտություն, մեխանիկա և մեքենաշինություն, տրասնպորտ: Լաբորատորիան ուսանողներին կտրամադրի տեխնիկական դասընթացների ու հետազոտական աշխատանքի համակցման հնարավորություն՝ նրանց պրոֆեսիոնալ ճարտարագիտական աշխատանքի նախապատրաստելու նպատակով:

Համաձայն հուշագրի՝ ՀՀ կրթության և գիտության նախարարությունը հանձն է առնում վերանորոգել ՀՊՃՀ-ում ՀԱՃԼ-ին տրամադրվող տարածքը՝ ԱՄՆ ՄԶԳ Շրջակա միջավայրի աղտոտման նվազեցման և մշտադիտարկման ծրագրի (EMMP) չափանիշներին համապատասխան: ԱՄՆ ՄԶԳ-ն նախատեսում է տրամադրել նոր սարքավորումներ, ինչպես նաև տեխնիկական օժանդակություն՝ ՀԱՃԼ աշխատակազմի և ղեկավարության վերապատրաստման, հիմնական վեց առարկաների գծով ճարտարագիտական ուսումնական ծրագրի բարելավման և դասախոսների կատարելագործման նպատակով: ՀՊՃՀ-ը հանձն է առնում համալսարանի և հրավիրված դասախոսների միջոցով կազմակերպել բակալավրի, մագիստրոսի և հետազոտողի կրթական ծրագրերով սովորող ուսանողներին դասավանդելու և հետազոտություններ իրականացնելու գործընթացը և ապահովել ՀԱՃԼ-ի տարածքի շահագործումն ու սպասարկումը՝ ծրագրի ընթացքում և ավարտից հետո: