Տրապիզոնի ժանդարմերիան Դինքի սպանության օրը հետևել է նրան

Ստամբուլի հայկական «Ակոս» պարբերականի գլխավոր խմբագիր Հրանտ Դինքի սպանության գործով նոր բացահայտում է արվել: Պարզվել է, որ Հրանտ Դինքի սպանությունից 4 ամիս առաջ Տրապիզոնի ժանդարմերիայի հետախուզությունը հետևել է նրան՝ Ստամբուլում գտնվող իր տան մոտակայքում: Ինչպես հաղորդում է «Արմենպրես»-ը, այս մասին տեղեկացնում է «Ակոս» պարբերականը:

Դինքի սպանվելու մասին Յասին Հայալի ազգական Ջոշկուն Իղջին 2006թ․ ամռանը հայտնել է Տրապիզոնի ժանդարմերիայի հետախուզության բաժին։

«Ալ- Ջազիրա»-ի լրագրող Սելահաթթին Գյունդայը հաղորդում է, որ Տրապիզոնի ժանդարմերիայի հետախուզության 4 աշխատակից սպանությունից չորս ամիս առաջ՝ 2006թ․ օգոստոսի 8-11-ը, գտնվել են Ստամբուլում։ Ուսումնասիրելով Տրապիզոնի ժանդարմերիայի աշխատակիցների՝ բջջային հեռախոսազրույցները՝ հայտնի է դարձել, որ նրանց հեռախոսները օգոստոսի 8-11-ի ընթացքում ազդանշան են արձակել Ստամբուլի Բաքըրքյոյ թաղամասից։ Ուսումնասիրելով Դինքին պատկանող բջջային հեռախոսի ձայնագրությունները՝ պարզ է դարձել, որ նույն օրերին Դինքը ևս գտնվել է նույն թաղամասում: Այս բացահայտումը ներառվել է զեկույցի մեջ:

Հեռախոսային ազդանշանների ուսումնասիրության արդյունքում բացահայտվել է նաև, որ Դինքի սպանության օրը ժանդարմերիայի 5 ներկայացուցիչ եղել է սպանության վայրում: