Պարզվել է Անկարայի պայթյունի հեղինակի ինքնությունը. հրապարակվել է ԴՆԹ-ի անալիզի արդյունքը

Թուրքիայում բացահայտվել է փետրվարի 17-ին Անկարայում 28 մարդու մահվամբ ավարտված ահաբեկչական պայթյունն իրագործած անձի անունը:

Ինչպես հաղորդում է «Արմենպրես»-ը' վկայակոչելով թուրքական DemokratHaber կայքը, պարզվել է, որ ահաբկեչական գործողոթյունն իրականացրել է ոչ թե Թուրքիայի ղեկավարության կողմից ավելի վաղ նշված ծագումով Սիրիաից Սալիհ Նեջարը, այլ Վանի բնակիչ Աբդուլբաքի Սյոմերը, ում ծածկանունը Զընար Ռափեր է:

Թուրքական կողմը դրանում համոզվել է այն բանից հետո, երբ ահաբեկչական գործողության պատասխանատվությունը ստանձնած Քրդստանի ազատության բազեներ (TAK) կազմակերպությունը հայտարարել էր, որ պայթյունն իրագործել է Աբդուլբաքի Սյոմերը, պատկան կառույցները ԴՆԹ-ի անալիզ են վերցրել Վանում բնակվող նրա հորից' Մուսա Սյոմերից եւ համեմատել պայթյունի վայրում ահաբեկչի մասերի նմուշներից վերցված ԴՆԹ-ի հետ, ինչով էլ հաստատվել է նրա ինքնությունը:

Անկարայում տեղի ունեցած պայթյունից հետո թուրքական կառավարության անդամները եւ նախագահ Թայիփ Էրդողանը շտապել էին հայտարարել, որ «հարձակումը կատարել է YPG-ն, եւ այն իրագործել է Ռոջավայից (սիրիական Քրդստան) եկած Սալիհ Նեջարը»: Սակայն, պայթյունից երեք օր հետո պատասխանատվությունը ստանձնած TAK-ը հայտարարել է, որ այն իրագործել է Աբդուլբաքի Սյոմերը:

Վերջինիս ավագ եղբայրը' Նուրի Սյոմերը, ԶԼՄ-ներին հայտարարել է, որ այդ մասին իրենք թուրքական պետության կողմից պաշտոնապես չեն տեղեկացվել, սակայն, ելնելով այն բանից, որ Վանի ժողովուրդը խիստ հետաքրքված է նրանով, որոշել են հոգեհանգիստ եւ թաղման արարողություն կազմակերպել:

Անկարայի պայթյունից, որն իրագործվել էր Թուրքիայի զինված ուժերի գլխավոր շտաբի եւ զինվորական հանրակացարանի շենքերի մոտ, 28 սպանվածներից 20-ը բարձրաստիճան ռազմական օդաչուներ են եղել: Այդ միջադեպի հետ կապված 21 կասկածյալներ են ձերբակալվել: Նրանցից 14-ը կալանավորվել են, սակայն, հետո 7-ն ազատ են արձակվել: Մնացածներին, եթե նրանց մասնակցությունը պայթյունին հաստատվի, ցմահ ազատազրկում է սպասվում: