Օբաման պատրանքներ չունի Սիրիայում հրադադարի վերաբերյալ

ԱՄՆ-ի նախագահ Բարաք Օբաման հայտարարել է, որ Վաշինգտոնը բոլոր ջանքերը կգործադրի Սիրիայում հրադադարի ռեժիմն ապահովելու համար, տեղեկացնում է «Արմենպրես»-ը՝ հղում անելով Reuters գործակալությանը: Ընդսմին ԱՄՆ-ի ղեկավարը նշել է, որ պատրանքներ չունի զինադադարի վերաբերյալ:

«Մեզանից ոչ ոք իրեն չի սփոփում պատրանքներով: Մենք հասկանում ենք, որ կան բազմաթիվ պոտենցիալ ստորջրյա խութեր, թերահավատության պատճառներ, պատմությունը մեզ չի ների, եթե մենք չկատարենք մեր աշխատանքը, որպեսզի դիվանագիտական ջանքերով վերջ դնենք ահավոր հակամարտությանը»,- հայտարարել է Օբաման ԱՄՆ-ի Ազգային անվտանգության խորհրդի նիստից հետո: Նա նշել է, որ զինադադարը կօգնի Սիրիայում իջեցնել բռնությունների մակարդակը և հումանիտար օգնության ճանապարհ բացել:

ԱՄՆ-ի նախագահն ասել է, որ առաջիկա օրերը խիստ կարևոր կլինեն պայմանավորվածությունների իրագործման համար: Նա հորդորել է դադարեցնել մարտական գործողությունները Սիրիայում, այդ թվում՝ ավիահարվածները: «Դա կլինի այն բանի յուրատեսակ ստուգում, թե բոլոր կողմերը որքանով են պատրաստ ճգնաժամի քաղաքական կարգավորման բանակցություններին»,- հայտարարել է Օբաման:

Դրա հետ մեկտեղ ԱՄՆ-ի ղեկավարն ընդգծել է, որ իր երկիրը Սիրիայում և Իրաքում կշարունակի մարտական գործողությունները «Իսլամական պետություն» միջազգային ահաբեկչական կազմակերպության զինյալների դեմ: «Ես ցանկանում եմ միանգամայն պարզորոշ ասել, որ ոչ մի հրադադար չի լինի ԻՊ-ի նկատմամբ»,- նրա խոսքը մեջբերել է ՌԻԱ Նովոստին:

Օբաման նաև կրկնել է, որ Սիրիայում քաղաքացիական պատերազմը չի ավարտվի այնքան ժամանակ, քանի դեռ Դամասկոսում իշխանության գլուխ է մնում նախագահ Բաշար Ասադը: Նա հավելել է, որ այդ հարցի շուրջ «էական տարաձայնություններ» են պահպանվում ԱՄՆ-ի, Ռուսաստանի, Իրանի և տարածաշրջանային մի քանի այլ խաղորդների միջև: