Թուրքիայում Էրդողան-սահմանադրական դատարան դիմակայություն է սկսվել

Թուրքական «Ջումհուրիեթ» թերթի լրագրողներ Ջան Դունդարին և Էրդեմ Գյուլին ազատ արձակելու մասին Սահմանադրական դատարանի որոշումը պատճառ է դարձել իրեն այդ երկրի միանձնյա տիրակալ համարող նախագահ Թայիփ Էրդողանի և ՍԴ-ի միջև դիմակայության:

Ինչպես հաղորդում է «Արմենպրես»-ը' վկայակոչելով թուրքական ԶԼՄ-ները, պատասխանելով դատարանի վճռի նկատմամբ Էրդողանի թույլ տված անհարգալից արտահայտություններին, Թուրքիայի ՍԴ-ի նախագահ Զյուհթու Արսլանը հայտարարել է, որ դատարանի վճիռը պարտադիր տարածվում է բոլորի վրա:

«Ժողովրդավարական իրավական պետություն ասվածը հավասարապես տարածվում է ինչպես իրավական օրենքները կառավարողների, այնպես էլ կառավարողներին պահպանող պետության վրա»,- ասել է Զյուհթու Արսլանը՝ հասկացնելով Էրդողանին, որ պետք է հարգել և կատարել դատարանի վճիռը:

Թուրքական ՍԴ-ի նախագահը նաև դատապարտել է իշխող «Արդարություն և զարգացում» կուսակցությանը մոտ կանգնած մամուլին, որը պաշտպանել էր Էրդողանի հայտարարությունը, ընդգծելով, որ ոչինչ և ոչ ոք չի կարող փոխել դատարանի վճիռը:

Էրդողանը հայտարարել էր, որ «չի ճանաչում և չի հարգում» Ջան Դունդարին և Էրդեմ Գյուլին ազատ արձակելու մասին ՍԴ-ի վճիռը:

«Ջումհուրիեթ» թերթի լրագրողներ Դունդարն ու Գյուլը տեսանյութ էին տարածել, որով ապացուցվում է Թուրքիայի ազգային անվտանգության ծառայության և «Իսլամական պետություն» ահաբեկչական խմբավորման միջև սերտ համագործակցությունը:

Թուրքիայի ՍԴ-ի նկատմամբ Էրդողանի ցուցադրած անհարգալից վերաբերմունքը քննադատել է նաև թուրքական հասարակության առաջադեմ հատվածը:

Թուրքիայում մտավորականությունը հանդես է եկել Էրդողանի անմարդկային ռեժիմը դատապարտող հայտարարությամբ:

Թուրքական ԶԼՄ-ները տարածել են 67 թուրք մտավորականների ստորագրած' «Թուրքիայի նախագահ Ռեջեփ Թայիփ Էրդողանի վարչակարգը կբերի աղետի» վերնագրով հայտարարությունը:

Նշվում է, որ այդ հայտարարությունն ուղղված է Թուրքիայում հաճախ կրկնվող մարդու իրավունքների խախտումներին մարդկանց ուշադրությունը հրավիրելու, ինչպես նաև խոսքի ազատության խնդրին:

Հայտարարության մեջ ասվում է, որ քրդական խնդրի լուծման համար Էրդողանի ռեժիմի կողմից անմարդկային մեթոդներ են կիրառվում, իսկ դրա դեմ բողոքող մարդիկ ձերբակալվում և մեղադրվում են նախագահին վիրավորելու մեջ: Նշվում է նաև, որ իշխանություններն ամեն կերպ խոչընդոտում են ԶԼՄ-ների ներկայացուցիչների աշխատանքին:

Թուրքական ԶԼՄ-ներն ավելի վաղ հայտնել էին, որ KanaltՖrk և BugՖn TV մասնավոր հեռուստաալիքները և Millet Gazetesi թերթը, ինչպես նաև KanaltՖrk Radyo ռադիոկայանը, որոնք մտնում էին Koza-Ipek հոլդինգի կազմի մեջ, իշխանությունների կողմից փակվել են Թուրքիայում: