Ալիևը մեկնում է Թուրքիա

Թուրքիայի մայրաքաղաքում մարտի 13-ին տեղի ունեցած ահաբեկչությունից հետո Ադրբեջանի նախագահ Իլհամ Ալիևը որոշում է կայացրել մարտի 15-ին այցելել Անկարա՝ հանդիպելու Թուրքիայի նախագահ Ռեջեփ Թայիփ Էրդողանի հետ: Ինչպես հաղորդում է «Արմենպրես»-ը, այս մասին տեղեկացնում է թուրքական «Միլլիեթ » պարբերականը:

Ուշագրավ է, որ մարտի 15-ին նախատեսված էր հենց Էրդողանի այցը Բաքու, սակայն ահաբեկչությունից հետո ակնկալվում էր, որ այն կհետաձգվի:

Էրդողանն Ադրբեջան պետք է այցելեր դեռևս փետրվարի 18-ին, սակայն փետրվարի 14-ին Անկարայում կրկին ահաբեկչություն էր տեղի ունեցել, ինչի հետևանքով նախագահը հետաձգել էր այցը:

Թուրքիա-Ադրբեջան բարձր մակարդակի ռազմավարական համագործակցության խորհրդի նիստը, որն ակնկալվում էր անցկացնել Բաքվում, կգումարվի մարտի 15-ին Անկարայում: Ակնկալվում է, որ նիստի և հանդիպումների ժամանակ էներգետիկ ոլորտում կարևոր որոշումներ կընդունվեն: Մասնակվորապես, կքննարկվեն տրանսանատոլիական գազատարին առնչվող հարցեր: