2012-ի մարտին արդեն կգործի «Էկոպրոթեքտ» գործարանը

Նոյեմբերի 11-ին Արտակարգ իրավիճակների նախարար Արմեն Երիցյանն այցելեց Նուբարաշենում գտնվող վնասակար նյութերի այրման «Էկոպրոթեքտ» գործարան: Նախարարը շրջեց գործարանի տարածքում, ծանոթացավ կիրառվող տեխնոլոգիային: Գործարանի տնօրեն Ստեփան Ախոյանը ներկայացրեց, որ «Էկոպրոթեքտ»շահագործման է հանձնվել այս տարվա հոկտեմբերին:

Գործարանի հիմնական նպատակը վնասակար նյութերի, այդ թվում' հիվանդանոցային վտանգավոր թափոնների, այրման ենթակա որոշ քիմիկատների, վարակված անասունների, ժամկետանց դեղորայքի վերացումն է այրման միջոցով: Այժմ «Էկոպրոթեքտ» -ում գործարկվում է հիվանդանոցային թափոնների այրման փորձնական ցիկլ: Արտակարգ իրավիճակների նախարարը հանձնարարեց, որ բոլոր պարամետրերով գործարանում պահպանվեն անհրաժեշտ ստանդարտները, նշելով, որ հետամուտ է լինելու, որպեսզի իր գործունեության ընթացքում «Էկոպրոթեքտն» ամբողջովին համապատասխանի միջազգային ամենաբարձր պահանջներին:

«Գործարանում երկու խցիկային վառարան կա: Առաջին խցիկում կատարվում է բուն այրումը, երկրորդում իրականացվում է արձակված գազի ֆիլտրացում», - պատմեց գործարանի տնօրեն Ստեփան Ախոյանը: «Միջազգային ստանդարտներով թափոնների վերացման նման տարբերակը վնասակար չէ, սակայն գործարանի բացումից առաջ անպայմանորեն կկատարվեն համապատասխան չափումներ, որպեսզի մեկ անգամ ևս վերջնականապես համոզվենք, որ արտանետումների չափանիշները լիովին համապատասխանում են միջազգային ստանդարտներին և անվտանգ են շրջակա միջավայրի համար: Ամբողջ հոսքագիծը կառավարվում է համակարգիչների միջոցով, բոլոր անսարքությունների մասին հաղորդում է համապատասխան ազդանշանային համակարգը, որը հնարավորություն է տալիս անմիջապես վերացնել թերությունը: Գործարանն ապահովված է հատուկ սառնարան-մեքենաներով' վտանգավոր թափոնների անվտանգ տեղափոխման համար, իսկ գորածարանի տարածքում կա այդ թափոնների պահպանման համար պահեստ սառնարան»: Տնօրենը խոստացավ, որ 2012-ի մարտին արդեն «Էկոպրոթեքտ» գործարանը կգործի: