Մեր նպատակն է՝ ազատ մուտք ունենալ եվրոպական միասնական շուկայում. Վարչապետ

Վարչապետ Տիգրան Սարգսյանն երեկ՝ նույեմբերի 11-ին, մասնակցել է Երևանում կազմակերպված «Արևելյան գործընկերության քաղաքականության ազգային և եվրոպական հարթությունները» խորագրով ամենամյա 7-րդ միջազգային երկօրյա համաժողովին: Կառավարության ղեկավարն իր ելույթում ներկայացրել է Հայաստանի՝ ԵՄ-ին ինտերգրման, մեր երկրում իրականացվող բարեփոխումների ընթացքը և այլ հիմնահարցեր:

Տիգրան Սարգսյանի խոսքով՝ Հայաստանն ընտրել է եվրաինտեգրման ճանապարհը, քանի որ արդար պետության և հասարակության կառուցման լավագույն մոդելը դրսևորվում է Եվրոպայում, և այն արժեքային համակարգը, որին մեր պետությունն ապավինում է՝ գործում է հենց այնտեղ: «Մեր նպատակն ու խնդիրն է ուսումնասիրել Եվրոպայի փորձը, բացահայտել այնտեղ առկա խնդիրները և Հայաստանում ներդնել եվրոպական չափանիշներ»,- ասել է վարչապետը: Նա նշել է, որ մեր երկրում հռչակված արժեքների և իրականության մեջ գոյություն ունի ճեղվածք և այն լրացնելու համար Հայաստանին անհրաժեշտ է ԵՄ-ի տեխնիկական և ֆինանսական օժանդակությունը, որն էլ ցուցաբերվում է մեր պետությանը Արևելյան գործընկերության քաղքականության շրջանակներում: «Այդ օժանդակության նպատակն է լրացնել այդ ճեղքը, ավելացնել մեր երկրի կարողությունները տարբեր ուղղություններով, և ամբողջությամբ իրականացնել ԵՄ-ի հետ մեր համատեղ ծրագրերը: Համոզված ենք, որ մեր ընտրությունը ճիշտ է: Պարզապես անհրաժեշտ է դրսևորել քաղաքական կամք՝ կարողանալ Հայաստանում արդյունավետ կերպով իրականացնել բարեփոխումներ՝ տարբեր ոլորտներում»,- նշել է կառավարության ղեկավարը:

Վարչապետի խոսքով՝ կառավարության նպատակն է այդ բարեփոխումներով Հայաստանի հաասարակական կյանքում ներդրնել եվրոպական չափանիշներ: «Մեր նպատակն է՝ ազատ մուտք ունենալ եվրոպական միասնական շուկայում և մարդկանց համար ապահովել ազատ տեղաշարժ ողջ Եվրոպայում: Այս գործընթացը մեզանից պահանջում է 3-4 տարվա աշխատանք և համապատասխանեցում ԵՄ-ի չափանիշներին: Այդ աշխատանքներն ընթացքի մեջ են, որոնք կնպաստեն նաև Հայաստանում կյանքի որակի բարձրացմանը»,- ընդգծել է Տիգրան Սարգսյանը:

Կառավարության ղեկավարը նշել է, որ բարեփոխումների իրականացումը պետք է լինի արագ՝ համահունչ ժամանակակից աշխարհի զարգացումներին: «Այսօր զարգացած են համարվում նոր գիտելիք արտադրող պետությունները, մրցակցությունը ներկայումս նոր գիտելիքի ստեղծման դաշտում է: Ժամանակակից աշխարհի հենքային գործոնը մտագործունեությունն է և մենք պետք է գործենք այս ուղղությամբ: Մենք պետք է անենք ամեն ինչ՝ ինտելեկտուալ մարդուն ինքնադրսևորվելու հնարավորություն տվող ենթակառուցվածքների ստեղծման համար»,- ասել է Տիգրան Սարգսյանը: