«Երկիր». Այս ընտրությունները ոչ միայն աննախադեպ, այլև սենսացիոն իրողություն էին

Իշխող քաղաքական մեծամասնությունը, որը մայիսի 6-ին հաջողությամբ հասցրեց ընտրություններում «պահպանել առաջատարի դիրքը», մինչև ընտրության օրն իր առաջին դեմքի բերանով խոստացել էր, որ այս ընտրություններ լինելու են աննախադեպ, թափանցիկ ու արդար:
Այս ձևակերպումից, թերևս, աննախադեպ ու թափանցիկ բառերին կարելի է համաձայնել այդպես էլ եղան, իսկ «արդարը» հենց այսպես՝ պետք է առնել չակերտների մեջ: Այս ընտրություններն իրոք աննախադեպ էին, որովհետև միայն աննախադեպությամբ կարող էր երկրի տնտեսությունը քայքայած, երկրի բնակչության 40 տոկոսին աղքատության հասցրած, երկրի պետպարտքը, հատկապես արտաքին պարտքն ավելացրած, Թուրքիայի հետ խայտառակ արձանագրություններ ստորագրած, որդեգրած և այլ «հերոսություններով» մեզ ամեն օր դեպի անդունդ տանող քաղաքական ուժը «ստանալ» քաղաքացիների «վստահության» այդպիսի բարձր ցուցանիշ: Սա ոչ միայն աննախադեպ, այլև սենսացիոն իրողություն է: Ինչ վերաբերում է թափանցիկությանը՝ այո, իսկապես այս ընտրությունները ավելի քան թափանցիկ էին. հակառակ դեպքում ինչպե՞ս պետք է իմանայինք, որ 12 ժամ պահպանվելու «պարտավորություն» ունեցող թանաքանյութը արագ ցնդեցնելու եղանակ է հորինել հնարամիտ հայ հանձնաժողովականը, որ մարդկանց ընտրելու իրավունքը «կրկնապատկվել ու եռապատկվել է», որ կարուսելը ոչ թե զվարճանքի միջոց է, այլ զանգվածային ընտրախախտման մեթոդ, ընդ որում՝ աննախադեպ բացահայտ, որ կարող են մի գիշերում մի քանի բազմահարկ շենքեր հայտնվել մայրաքաղաքում՝ հարյուրավոր բնակիչներով: Իսկ նրանք ո՞ւմ ընտրողներեն են, բնականաբար՝ ով նրանց «ստեղծագործել» է: