Մանուկ Վարդանյանը ներկայացրել է ՀՀ-ում իրականացվող ենթակառուցվածքային նախագծերը

Նոյեմբերի 10-11-ը Համաշխարհային բանկի կողմից հրավիրված Հարավային Կովկասի տրանսպորտային ենթակառույցների զարգացման հեռանկարների հարցերով բարձրաստիճան համակարգող հանդիպմանը մասնակցելու նպատակով՝ Թբիլիսիում գտնվող ՀՀ տրանսպորտի և կապի նախարար Մանուկ Վարդանյանն երկկողմ աշխատանքային հանդիպումներ է ունեցել նաև Վրաստանի վարչապետ Նիկա Գիլաուրիի, Վրաստանի ենթակառուցվածքների և տարածքային զարգացման նախարար Ռամազ Նիկոլայիշվիլիի, Համաշխարհային բանկի տարածաշրջանային տնօրեն Ասադ Ալամի, Եվրոպական ներդրումային բանկի ներկայացուցիչների հետ:

Վրաստանի վարչապետ Ն. Գիլաուրիի հետ հանդիպմանը ՀՀ տրանսպորտի և կապի նախարար Մանուկ Վարդանյանը ներկայացրել է Հայաստանի Հանրապետությունում իրականացվող ենթակառուցվածքային նախագծերը, քննարկվել են փոխադարձ հետաքրքրություն ներկայացնող հարցեր, մասնավորապես՝ միջազգային բեռնափոխադրումների դյուրացման, Վերին Լարս–Կազբեկի սահմանային կետով ձմեռային ժամանակահատվածում բեռների փոխադրման խնդիրները, Հայաստանի «Հյուսիս-Հարավ» ավտոմոբիլային մայրուղու շարունակությունը հանդիսացող Ախալցիխե-Բաթումի ավտոմոբիլային ճանապարհի շինարարության ընթացիկ իրավիճակը:

Վրաստանի ենթակառուցվածքների և տարածքային զարգացման նախարար Ռամազ Նիկոլայիշվիլիի հետ հանդիպման ընթացքում կողմերը քննարկել են տրանսպորտային ենթակառուցվածքների բնագավառում հայ-վրացական համագործակցության զարգացման հետ կապված հարցեր: Երկուստեք ընդգծվել է, անկախ սեզոնային բնույթից, Կազբեկի-Վերին Լարս վրաց-ռուսական սահմանային անցակետի մշտապես գործելու կարևորությունը: ՀՀ տրանսպորտի և կապի նախարարի կողմից առաջարկվել է ստեղծել համատեղ ձեռնարկություն՝ ձմեռային սեզոնի ընթացքում սահմանային անցակետի անխափան աշխատանքն ապահովելու նպատակով: Կողմերի միջև պայմանավորվածություն է ձեռք բերվել շարունակել համագործակցությունը՝ տրանսպորտի բնագավառում տարածաշրջանային և միջազգային կազմակերպությունների և նախաձեռնությունների շրջանակներում:

Հանդիպման արդյունքներով՝ ստորագրվել է Նախարարների համատեղ Հայտարարություն:

ՀՀ տրանսպորտի և կապի նախարար Մանուկ Վարդանյանին ընդունել է նաև Համայն Վրաց Կաթողիկոս-Պատրիարք Իլյա 2-րդը: Կարևորելով երկու նախարարների միջև ստեղծված աշխատանքային բարիդրացիական հարաբերությունները՝ կաթողիկոսը բեղմնավոր համագործակցություն և հաջողություններ է մաղթել կողմերի հետագա բոլոր ձեռնարկումներին: