Ընտրությունների արդյունքները տրամաբանական են, անսպասելի բան չկա. Ալեքսանդր Իսկանդարյան

Այս ընտրությունների առանձնահատկությունը շատ ուժեղ մրցակցությունն էր և պայքարն ընթանում էր ոչ թե ընդդիմության ու իշխանության, այլ միևնույն դաշտում գտնվող ուժերի միջև, այսօր լրագրողների հետ հանդիպման ժամանակ այս մասին հայտարարեց «Կովկաս» ինստիտուտի տնօրեն, քաղաքագետ Ալեքսանդր Իսկանդարյանը:

«Մրցակցություն 2007-ի ընտրություններին էլ կար, սակայն այս տարվա մրցակցությունն անհամեմատելի է նախորդ տարիների հետ: Մրցում էին ԲՀԿ-ն ու ՀՀԿ-ն, «Ժառանգությունն» ու ՀԱԿ-ը, այլ ոչ՝ ընդդիմությունն ու կոալիցիան: Հաջորդ առանձնահատկությունը լրատվամիջոցների կողմից ընթացքի լուսաբանումն էր: Նման ազատ լուսաբանում, ինչպիսին այս տարի էր, ես չեմ հիշում», - նշեց քաղաքագետը:

Ըստ քաղաքագետի՝ ԲՀԿ-ն խորհրդարանական ընտրությունների ընտրարշավի ընթացքում ավելի «արմատական» ընդդիմություն էր, քան իրեն այդպիսին համարող ՀԱԿ-ը։

Իսկանդարյանի կարծիքով՝ սա տեխնոլոգիաների ընտրություն էր: Ըստ քաղաքագետի՝ այս անգամ ավելի որոշիչ դեր են ունեցել ընտրողներին գրավելու տեխնոլոգիաները, որոնք կիրառվել են, քան կուսակցությունների գաղափարախոսությունն ինքնին:

«Այն կուսակցությունները, որոնք գաղափարական հենքի վրա էին խաղադրույք դնում, պարտվել են, իսկ տեխնոլոգիայի վրա հիմնվածները՝ հաղթել: Ընտրություններին մասնակցությունն ակտիվ էր, բայց դրանք նաև ցույց տվեցին մարդկանց հոգնածությունը քաղաքականությունից ու գաղափարախոսությունից», - ասաց նա:

Խոսելով ընտրությունների արդյունքների մասին, Իսկանդարյանն ասաց, թե դրանք տրամաբանական են ու ոչ մի անսպասելի բան չի տեսնում: Հարցին՝ կկզամվի՞ արդյոք նոր խորհրդարանում կոալիցիա, Իսկանդարյանը պատասխանեց, որ իրեն ավելի հետաքրքիր է ոչ թե այն՝ ՀՀԿ-ն ու ԲՀԿ-ն կոալիցիա կկազմե՞ն, թե՞ ոչ, այլ թե արդյոք ՀՀԿ-ն ԲՀԿ-ին կառաջարկի՞ կոալիցիա կազմել: Իսկ այն, որ «Օրինաց երկիրը» ՀՀԿ-ի հետ կոալիցա կմտնի, ըստ քաղաքագետի, հաստատ է: