Բողոքի ակցիա Թուրքիայի խորհրդարանի առաջ

Թուրքիայի խորհրդարանի շենքի դիմաց ինքնաբուխ բողոքի ակցիա է սկսվել այն բանից հետո, երբ խորհրդարանի նախագահ Իսմայիլ Քահրամանն այսօր կեսօրին հայտարարել է, որ երկրի նոր սահմանադրությունը պետք է համապատասխանի իսլամի նորմերին:

Ինչպես հաղորդում է «Արմենպրես»-ը' վկայակոչելով թուրքական Demokrat Haber կայքը, նոր սահմանադրություն ստեղծելու շուրջ քննարկումների հետ կապված թուրք խոսնակը հայտարարել է, որ Թուրքիայի նոր սահմանադրության մեջ երկրի «աշխարհիկ կառուցվածքի մասին նորմ պետք է չլինի»:

Թուրքական խորհրդարանի մոտ հավաքված հազարավոր մարդիկ հայտարարում են, որ թույլ չեն տա Թուրքիայում ստեղծել «շարիաթի, խալիֆաթի սահմանադրություն»:

Ոստիկանությունը արցունքաբեր գազ է կիրառել ցուցարարների նկատմամբ, եւ դրա հետ միասին բազմաթիվ մարդկանց բռնի կերպով բերման ենթարկել ոստիկանական բաժանմունքներ:

Բողոքի ակցիայի մասնակիցները Թուրքիայի նախագահ Ռեջեփ Թայիփ Էրդողանին մեղադրում են իր ղեկավարած «Արդարություն եւ զարգացում» կուսակցության կողմից Թուրքիայի հանրապետության հիմնադիր Մուստաֆա Քեմալ Աթաթուրքի կողմից սահմանադրության մեջ ամրագրած աշխարհիկության արժեքները ցնցելու մեջ:

Նրանք նշում են, որ Թուրքիայի կառավարությունը վերջին երկու տարիներին վերացրել է դպրոցներում եւ հասարակական ծառայությունների բնագավառում աշխատող կանանց գլխաշոր կրելու դեմ արգելքը, մեծացրել կրոնական ուսումնարանների թիվը, սահմանափակել ոգելից խմիչքների վաճառքը, վերացրել խառը սեռի ուսանողական հանրակացարանները:

Թուրքիայի գլխավոր ընդդիմադիր Ժողովրդահանրապետական (քեմալական) կուսակցության առաջնորդ Քեմալ Քըլըչդարօղլուն խստորեն քննադատել է թուրքական խորհրդարանի խոսնակի այդ հայտարարությունները:

Նա ասել է, որ Մերձավոր Արեւելքում քաոսի առկայությունը նման «հիմար» մտածելակերպի արդյունք է:

Նշենք, որ Թուրքիայի նախագահ Էրդողանը կրոնական ուսումնարան է ավարտել: Թուրքական հասարակությունը բազմիցս կասկածի տակ է դրել նրա' աշխարհիկ բարձրագույն կրթություն ունենալը: