Մերիլին Մոնրոյի «մոսկովյան արկածները» և ԽՍՀՄ ՊԱԿ գաղտնի գործակալը

Աշխարհահռչակ հոլիվուդյան աստղ Մերիլին Մոնրոյի (Marilyn Monroe) անձնական կյանքն այսօր էլ մնում է գաղտնիքներով լի նույնիսկ նրա կենսագրության հետազոտությամբ զբաղվող մասնագետների համար: Ընդհանուր առմամբ կարելի է միայն հաստատել, որ նրա կյանքը ձանձրալի չի եղել` նույնիսկ եթե հաշվի չառնենք Մոնրոյի բազմաթիվ սկանդալային սիրավեպերը: Օրինակ` վերջերս լուրեր են սկսել պտտվել, որ Մերիլինը կապեր է ունեցել ԽՍՀՄ Պետական անվտանգության կոմիտեի (ՊԱԿ) հետ:

«ՊԱԿ նախկին աշխատակցուհու` Լյուդմիլա Տեմնովայի խոսքերով` Մերիլին Մոնրոն կապեր է ունեցել խորհրդային գաղտնի ծառայությունների հետ: Նա նույնիսկ գաղտնանուն է ունեցել` «Մաշա»»,- գրել է հայտնի իտալական Panorama պարբերականը:

Խոսքը «Մոնրոն` Դոստոևսկու երկրում» վավերագրական ֆիլմի մասին է, որը Ռուսաստանում առաջին անգամ ցուցադրվել է անցած տարվա վերջում, իսկ Արևմտյան երկրներում կցուցադրվի միայն մոտ ապագայում: Ֆիլմը Մոնրոյի` ԽՍՀՄ կատարած այցի մասին է:

Պատմությունը սկսվում է բավականին ռոմանտիկ երանգներով: Խորհրդային Միության դեսպանատանը կազմակերպված միջոցառմանը Մերիլինը ծանոթացել է խորհրդային մի գործակալի հետ: Համակրանքը վերածվել է ընկերության, այնուհետև` «որոշակի զգացմունքներ պարունակող հարաբերությունների»:

«Ֆիլմում վերոհիշյալ տղամարդը, որը չի ցանկացել հայտնել իր ինքնությունը, պնդել է, որ ինքը «ինտիմ հարաբերություններ» է ունեցել Մոնրոյի հետ: Ըստ նրա` Մոնրոն իր հրավերքով եղել է Մոսկվայում, որտեղից էլ նրանք մեկնել են իր ամառանոց: «Դրանք 2 անմոռանալի օրեր էին»,- պատմել է ԽՍՀՄ նախկին գործակալը: Սակայն, ըստ վերջինիս պատմածի, իրենք այլևս չեն հանդիպել, քանի որ նրանց հետևել են 2 երկրների գաղտնի ծառայությունները»,- նշված է Panorama պարբերականում տպագրված հոդվածում: