Սա քայլ էր դեպի կործանում. Երվանդ Մանարյան

«Սա մեկ քայլ առաջ էր՝ որոշակիորեն դեպի կործանում: Շատ որոշակի: Որովհետև սրանից ավելի մեծ արհամարհանք սեփական ժողովրդի նկատմամբ դժվար է պատկերացնել, թեև կարող է պատահել, որ իրենց հնարավորությունները շատ ավելի լուրջ են, և ունակ են է՛լ ավելիի: Ես, օրինակ, չէի պատկերացնում այդպիսի արհամարհանք ժողովրդի նկատմամբ», - Լուրեր.com-ի հետ զրույցում, խոսելով ԱԺ մայիսվեցյան ընտրությունների ընթացքի մասին, ասաց ժողովրդական արտիստ Երվանդ Մանարյանը:

«Կարելի է մտածել, որ պատմական մեծ առումով հարցի վերջնական լուծումը շատ հեռու չէ: Որովհետև այսպես շարունակվել չի կարող: Եթե միայն նայենք մեծամասնականով ընտրված պատգամավորների ցուցակը` ամբողջը նույն կուսակցությունն է», - ասաց Մանարյանը:

Ըստ նրա, արձանագրված ընտրախախտումները՝ թանաքի անհետանալը, մարդկային կուտակումները, դրանք բոլորը լուրջ մշակված քայլեր են եղել:

«Կարծես սովորական մի միջադեպ է նշվում թանաքի չքանալը, առավոտյան մարդկանց կուտակումները: Իմ կյանքի, իմ տարիների փորձն ասում է, որ դա խորապես, ճշգրտորեն մշակված է եղել: Դա լրջորեն ուսումնասիրված էր, և սադրված էր մեր ժողովրդի դեմ»,- ասաց Մանարյանը, և հավելեց, որ այս ամենը ուղղորդել են քվեարկության ողջ ընթացքը:

«Պետության առաջին դեմքերն այս ամենը հեշտությամբ «կուլ տվեցին», որովհետև՝ ի շահ իրենց էր: Պատմության մեծ կտրվածքով եթե նայենք, կործանումը շատ մոտեցրին: Եթե այսպես շարունակելու լինենք, հաջորդ քայլը անդունդն է», - եզրափակեց դերասանը։