Մահացու վրաերթ

Այսօր՝ մայիսի 8–ին, 10.30-ի սահմաններում վրաերթ է տեղի ունեցել Երևանում։ Ինչպես դեպքի վայրից հայտնել է ֆոտոլրագրող Գագիկ Շամշյանը, Մյասնիկյան պողոտայում՝ «Մամա Ֆլորա» ծաղկի սրահի դիմաց «Տոյոտա Լանդ Քրաուզեր» մակնիշի 01 VV 111 համարանիշի ավտոմեքենայի վարորդը վրաերթի է ենթարկել հետիոտնին։

Դեպքի վայրում հավաքվածները Շամշյանին պատմել են, որ ավտոմեքենան փորձել է հետ ընթանալ և տեղի է ունեցել վրաերթը։ Վարորդը փախուստի չի դիմել և իր ավտոմեքենայով վրաերթի ենթարկվածին տեղափոխել է Սուրբ Գրիգոր Լուսավորիչ բժշկական կենտրոն։

Դեպքի վայրում հավաքվածները Գ. Շամշյանին պատմել են, որ հետիոտնը փողոցը անցնելիս է եղել չթույլատրելի հատվածից։ Ֆոտոլրագրողը հայտնում է, որ ավտոմեքենան վարել է Կոտայքի մարզի Ձորաղբյուր գյուղի 8-րդ փողոցի բնակիչ 33-ամյա Արման Ավետիսյանը:

Վերջինին Սբ Գրիգոր Լուսավորիչ Բժշկական կենտրոնից Ոստիկանության Նոր Նորքի բաժնի օպերատիվ խումբը քիչ առաջ տեղափոխել են Նոր Նորքի Ոստիկանություն։ Վրաերթի վայրում հավաքված մարդկանց պատմածով Տոմա անունով տուժածը գիտակցության չգալով մահացել է։

Փաստի առթիվ ոստիկանության քննչական գլխավոր վարչության Երևանի քննչական վարչության ճանապարհատրանսպորտային հանցագործությունների քննության բաժնի քննիչ Խաչիկ Սամվելյանի կողմից նյութեր են նախապատրաստվում և հավանաբար կհարուցվի քրեական գործ ՀՀ Քրօրի 242 հոդվածի 2-րդ մասի հատկանիշներով։

Հիվանդանոցում ֆոտոլրագրողին նաև պատմել են, որ նշված ավտոմեքենան սպասարկում է Պաշտպանության նախարարության բարձրաստիճան պաշտոնյաներից ինչ–որ գնդապետի։

Ոստիկանությունը ձեռնարկում է քննչական գործողություններ՝ պարզելու վրաերթի ենթարկված անձի ինքնությունը։

tert.am