Հայ դերասանները կմասնակցեն Մեծ Բրիտանիայում անցկացվող Շեքսպիրյան փառատոնին

2012 թ. ապրիլի 23-ին Մեծ Բրիտանիայում մեկնարկել է շուրջ 6 ամիս ընթացող մշակութային համաշխարհային օլիմպիադան, որի շրջանակներում կանցկացվի անգլիացի մեծանուն դրամատուրգ Վիլյամ Շեքսպիրին և նրա անմահ ստեղծագործություններին նվիրված «Globe to Globe» խորագրով թատերական փառատոնը: Դեռևս 2011 թ. փառատոնի կազմկոմիտեն աշխարհի ավելի քան 200 երկրների թատրոններից ընտրել է 37 լավագույներին, որոնք էլ հանրահայտ «Գլոբուս» թատրոնում 37 լեզուներով կներկայացնեն շեքսպիրյան դրամատուրգիան:

2011 թվականին հեղինակավոր այս փառատոնին մասնակցելու հրավեր է ստացել նաև Գ. Սունդուկյանի անվան ազգային ակադեմիական թատրոնը' «Ջոն արքա» ներկայացմամբ /բեմադրիչ՝ Տիգրան Գասպարյան/, որի ընտրությունը կատարվել է փառատոնի կազմակերպիչների կողմից: Փառատոնի պահանջներից բխող բոլոր մանրամասներն ու առանձնահատկությունները ներկայացնելու և քննարկելու նպատակով 2011 թ. Հայաստան էին ժամանել փառատոնի նախագահ Թոմ Բըրդը, թատրոնի գլխավոր պրոդյուսեր Մալու Անսալդոն և «Գլոբուս» թատրոնի հայազգի դերասան Գևորգ Մալիկյանը: Ըստ փառատոնի պահանջների, «Գլոբուսի» բեմում բեմադրությունները պետք է ներկայացվեն առանց ձայնային, լուսային էֆեկտների /ցերեկային լույսի ներքո/, երաժշտության կենդանի կատարմամբ, մասնակից երկրի մայրենի լեզվով, հանդիսատեսին տրամադրելով միայն պիեսի համառոտ նկարագրությունը՝ անգլերեն լեզվով: Նկատի ունենալով շեքսպիրյան թատրոնի բեմական հնարավորությունները՝ «Ջոն արքա» ներկայացման մեջ ընդգրկված 24 կերպարի փոխարեն «Գլոբուսում» հանդես կգան 12-ը՝ տասը դերասան և երկու երաժիշտ:

«Ջոն արքա» ներկայացման փորձերի ընթացքի լուսաբանման և ստեղծագործական խմբի հետ հանդիպման նպատակով Շեքսպիրյան փառատոնի կազմկոմիտեն Երևան էր գործուղել լրագրող Քլեր Օլֆրիին: Վերջինս ս. թ. ապրիլի 2-ին ներկա է գտնվել «Ջոն արքա» ներկայացման գլխավոր փորձին և իր տպավորություններով հանդես եկել անգլիական մամուլում: Բրիտանացի լրագրողի դիտարկմամբ՝ «չնայած, ներկայացումը հայերենով էր, այն հասկանալի էր և շատ տպավորիչ»:

Այսպիսով, Գ. Սունդուկյանի անվան ազգային ակադեմիական թատրոնը ս. թ. մայիսի 16-ին և 17-ին շեքսպիրյան «Գլոբուս» թատրոնում հանդես կգա «Ջոն արքա» ներկայացումով: