Արաբական երկրների լիգան սառեցրել է կազմակերպությանը Սիրիայի անդամակցությունը

Արաբական երկրների լիգան այսօր՝ նոյեմբերի 12–ին քաղաքական ճգնաժամի հաղթահարման մասին ձեռք բերված համաձայնությունները չկատարելու համար սառեցրել է կազմակերպությանը Սիրիայի անդամակցությունը։

Այս մասին հաղորդում է Reuters գործակալությունը։

«Արաբական երկրների լիգայի որոշումը պայմանավորված է քաղաքացիական ակցիաների նկատմամբ չդադարող բռնություններով»,– Կահիրեյում Սիրիայի հարցով կայացած Արաբական երկրների լիգայի արտահերթ ժողովի ավարտին հայտարարել է Քաթարի արտգործնախարար Համադ բեն Ջասեմը։

Այսպիսով, Սիրիան, որը եղել է 1944թ.–ին ստեղծված համաարաբական կազմակերպության հիմնադիրներից մեկը, առաջիկայում չի կարողանա մասնակցել կազմակերպության նիստերին։

Այժմ կազմակերպությունը մտադիր է տնտեսական և քաղաքական պատժամիջոցներ կիրառել Սիրիայի ղեկավարության նկատմամբ, ինչպես նաև կոչ անել Արաբական երկրների լիգայի բոլոր անդամներին ետ կանչել իրենց դեսպաններին Դամասկոսից։ Բացի այդ Արաբական երկրների լիգան մտադիր է Կահիրեյում հանդիպել Սիրիայի ընդդիմադիր կուսակցությունների ներկայացուցիչների հետ՝ անցումային շրջանում համատեղ մարտավարություն մշակելու համար։

Հիշեցնենք, որ նոյեմբերի սկզբին Արաբական երկրների լիգայի հետ ձեռք բերված պայմանավորվածության համաձայն Սիրիայի կառավարությունը պարտավորվել էր փողոցներից դուրս բերել զորքերը, դադարեցնել բռնությունները ընդդիմության նկատմամբ, ազատ արձակել բոլոր քաղբանտարկյալներին և երկխոսություն սկսել ընդդիմության հետ երկու շաբաթվա ընթացքում։ Բացի այդ Սիրիայի կառավարությունը պարտավորվել էր հնարավորությյուն տալ օտարերկրյա լրագրողներին, իրավապաշտպաններին և Արաբական երկրների լիգայի ներկայացուցիչներին ժամանել սիրիա և տեղում ծանոթանալ տիրող իրավիճակին։

Սակայն այս պայմանավորվածության ձեռքբերումից հետո էլ իրավապաշտպանները շարունակում են հաղորդել նոր բախումների և մարդկային զոհերի մասին։

Նշենք նաև, որ վերջերս Սիրիային Արաբական երկրների լիգայի անդամությունից զրկելու կոչով էր հանդես եկել Human Rights Watch միջազգային իրավապաշտպան կազմակերպությունը, որը Սիրիայի նախագահ Բաշար Ասադին մեղադրում է մարդկության դեմ գործած հանցագործությունների մեջ։

Թեմայի շուրջ կարդացեք նաև՝

Սիրիայում ներկա սցենարը կշարունակվի մի քանի տարի, մինչև երկիրը տնտեսապես քայքայվի

Սիրիայում ընդդիմադիրների հաղթանակն սպառնում է սիրիահայերի ֆիզիկական գոյությանը

Սիրիահայ գաղութը դատարկվում է

Անդերս Ֆոգ Ռասմուսեն. ՆԱՏՕ–ն չի միջամտի Սիրիայում տիրող իրավիճակին

Բաշար Ասադը աշխարհին սպառնում է լուրջ ցնցումներով (Տեսանյութ)