Ի՞նչ են մտածում շները

ԱՄՆ Ատլանտա քաղաքում գտնվող Էմերի համալսարանի (Emery University) մի խումբ ամերիկացի գիտնականներ մտադրվել են ՄՌՏ-ների միջոցով իմանալ՝ ինչի մասին են մտածում մեր «չորքոտանի բարեկամները», գրում է Los Angeles Times-ը։

«Մենք ձգտում ենք այն բանին, որ հասկանանք մարդու և շան միջև եղած հարաբերությունների բնույթը՝ մարդկային տեսակետից։ Յուրաքանչյուր մարդ, որը շուն է պահում, կարծում է, որ այն սիրում է իրեն։ Շատ շուտով մենք կպարզենք՝ շները սիրում են հենց մեզ, թե՞ այն կերակուրը, որը մենք տալիս ենք նրանց»,- ասել է հետազոտական խմբի գիտական ղեկավար Գրեգորի Բեռնսը։

Նրա խոսքերով՝ կենսաբանները կկարողանան առաջին անգամ փորձել հետազոտել «շների մտքերը»՝ հատուկ սարքավորման միջոցով։ Ավելի վաղ, նմանատիպ հետազոտությունների ժամանակ շներին թմրեցնում էին, ինչի հետևանքով ուղեղը դադարում էր ազդակներ ուղարկել։ 

Գիտնականները մտադիր են պարզել՝ ինչպե՞ս են շները ճանաչում իրենց տերերին՝ տեսքի՞ց, թե՞ հոտից, հասկանո՞ւմ են արդյոք մարդկային խոսքը և նույնիսկ փորձելու են իմանալ դրանց գթասրտության չափը բավականին ինքնատիպ միջոցով. շան աչքերի առաջ նրանք ասեղով ծակելու են տիրոջ լուսանկարը՝ միևնույն ժամանակ ֆիքսելով կենդանու արձագանքը։