Քոֆի Անանը կմեկնի Սիրիա

Արաբական պետությունների լիգայի (ԱՊԼ) և ՄԱԿ հատուկ բանագնաց Քոֆի Անանը մոտակա օրերս կայցելի Սիրիայի մայրաքաղաք Դամասկոս, հայտնում է Ֆրանս Պրես գործակալությունը՝ հղում կատարելով իր դիվանագիտական աղբյուրներից մեկին։

Հստակ ժամկետը չի նշվում։ Ներկայումս Սիրիայում գործում է Քոֆի Անանի՝ իրավիճակի կարգավորման ծրագրի շրջանակներում ձեռք բերված հրադադարի մասին համաձայնությունը։ Հիշեցնենք, որ ապրիլի 15-ին Սիրիա է մեկնել ՄԱԿ դիտորդների առաջին խումբը, որոնք հետևում են հրադադարի մասին համաձայնագրի կատարմանը, իսկ արդեն ապրիլի 21-ին ՄԱԿ ԱԽ-ն Սիրիա է ուղարկել 300 դիտորդից բաղկացած նոր խումբ։

Հիշեցնենք նաև, որ Սիրիայում ավելի քան մեկ տարի է՝ չեն դադարում հակակառավարական ցույցերը։ Գրեթե ամեն օր հաղորդագրություններ են ստացվում մարդկային զոհերի մասին։ ՄԱԿ տվյալներով՝ զոհերի ընդհանուր թիվը գերազանցել է արդեն 9 հազարը։