Թուրքական լաստանավն առևանգել է 27–ամյա քուրդ երիտասարդը

Երեկ՝ նոյեմբերի 11–ին Թուրքական Իզմիթ նավահանգստից առևանգված լաստանավն առևանգել է 27–ամյա քուրդ ծայրահեղական Մենսուր Գյուզելը։

Այս մասին հաղորդում է France-Presse գործակալությունը։

Թուրքիայի ՆԳ նախարար Իդրիս Նաիմ Շահին թուրքական NTV հեռուստաալիքի եթերից հայտնել է, որ Գյուզելը Քրդական աշխատավորական կուսակցության (ՔԱԿ) Քոջաելի նահանգի երիտասարդական կազմակերպության ղեկավարն է։

Նախարարի խոսքերով, զինվորականները Գյուզելի հետ բանակցություններ են սկսել լաստանավի առեվանգումից արդեն մի քանի ժամ հետո։ Բանակցությունները շարունակվել են ողջ գիշեր,սակայն հաջողություն չեն ունեցել։ Լուսադեմին հատուկ ջոկատայինները գրոհով վերցրել են լաստանավն ու սպանել երիտասարդին։

Հատուկ օպերացիայի ավարտից հետո հատուկ ջոկատայինները Գյուզելի մարմնի վրա պայթուցիչ սարք են հայտնաբերել։

Նախարարը նաև հայտնել է, որ երիտասարդը սովորում էր Թուրքիայի ԲՈՒՀ–երից մեկի ասպիրանտուրայում։

«Ես ցավում եմ երիտասարդի համար, որին ահաբեկիչներն, անկասկած, խաբել էին, ստիպելով՝ գնալ այդ քայլին»,– հայտարարել է նախարար Շահինը։

Նշենք, որ առևանգված լաստանավում եղել էր 18 ուղևոր և անձնակազմի 6 անդամ։ Նրանցից ոչ ոք չի տուժել։

Միջադեպի հետ կապված թուրքական ոստիկանությունը ձերբակալել է մի քանի մարդու, որոնք կասկածվում են, լաստանավի առևանգման հետ առընչություն ունենալու մեջ։

Իշխանությունները առևանգման համար մեղադրում են ՔԱԿ–ին. որոշ տեղեկությունների համաձայն Գյուզելը հրամայել է լաստանավի անձնակազմին ուղղություն վերցնել դեպի Իմրալի կղզի, որտեղ ցմահ բանտարկված է ՔԱԿ առաջնորդ Աբդուլա Օջալանը։

Սակայն Քուրդիստանի աշխատավորական կուսակցությունն առայժմ իր վրա չի վերցրել միջադեպի պատասխանատվությունը։