«Հրապարակ». Վլադիմիր Գասպարյանը որոշել էր զարմացնել միջազգային դիտորդներին անգլախոս ոստիկաններով

Ոստիկանապետ Վովա Գասպարյանը որոշել էր զարմացնել միջազգային դիտորդներին անգլախոս ոստիկաններով: Մայիսի 6-ին ընտրատեղամասեր էին գործուղվել հասարակական կարգի պահպանման «էլիտար» ստորաբաժանման ոստիկանները, ովքեր տիրապետում են անգլերենին: Թերթը հիշեցնում է, որ Վովա Գասպարյանի նախաձեռնությամբ ստեղծված պարեկապահակային ծառայություն իրականացնող հատուկ ստորաբաժանման անդամները ոչ միայն տիրապետում են օտար լեզուների, այլ նաև քաղաքակիրթ բանակցությունների նրբություններին, լավ մարզական վիճակում են և բարետես: Նրանց համազգեստի վրա պատկերված է խաղաղության խորհրդանիշ աղավնին,:Եվ մոտ 30 տոկոսը կանայք են: 

Թերթը նշում է նաև, որ քարոզարշավից մինչև ընտրության օրը ոստիկանությունում գործող թեժ գծով 62 հաղորդում է ստացվել, որոնցից 23-ը ստուգման արդյունքում չեն հաստատվել, 1 դեպքով քրեական գործ է հարուցվել՝ այն վերաբերում է Մալաթիա-Սեբաստիա համայնքում Գայանե Առուստամյանի և մի քանի այլ ՀԱԿ համակիրների վրա կատարված հարձակմանը: Մնացած 32 դեպքով նյութեր են նախապատրաստվում: Իսկ մայիսի 6-7-ը գրանցվել է 78 դեպք, որոնցից 3-ը մերժվել է կրկին հանցակազմի բացակայության հիմքով: 4-ով քրեական գործ է հարուցվել, մի քանի դեպքով էլ նյութեր են նախապատրաստվում: