Սիրիայում յուրաքանչյուր մահացողի արյունը Էրդողանի ձեռքերին է. Քըլըչդարօղլու

Թուրքիայի գլխավոր ընդդիմադիր Ժողովրդահանրապետական կուսակցության (ԺՀԿ) առաջնորդ Քեմալ Քըլըչդարօղլուն հայտարարել է, որ Սիրիայում յուրաքանչյուր մահացողի արյունը Թուրքայի նախագահ Ռեջեփ Թայիփ Էրդողանի ձեռքերին է:

Այս մասի հաղորդում է թուրքական DemokratHaber կայքը, Քըլըչդարօղլուն հայտարարել է Թուրքիայում նախագահական համակարգ ստեղծելու համար աննախադեպ հակասահմանադրական քայլերի դիմող Էրդողանի հասցեին իր քննադատությունների պատճառով իրեն թիրախ դարձնելու առնչությամբ:

Նախագահական համակարգի հետ կապված Քըլըչդարօղլուն Էրդողանին ասել է, որ «առանց արյուն թափելու, չեք կարող իրականացնել»:

«Էրդողանի ձեռքերն արյունոտ են: Սիրիայում յուրաքանչյուր մահացողի արյունը նրա ձեռքերին է: Մենք տեսանք, թե ինչպես են Թուրքիայում Էրդողանի հավատարիմ ծառաները փողոցներում լինչի դատաստանի ենթարկում մարդկանց: Ամենուրեք արյուն է հոսում: Նրա ձեռքերը նաեւ Սիրիայում են: Օրը կգա' նա դրա հաշիվն էլ կտա», -ասել է Քըլըչդարօղլուն:

Թուրքիայում նախագահական համակարգի անցնելն առանց արյուն թափելու անհնարիության մասին հայտարարել է նաեւ Հայոց ցեղասպանության կազմակերպիչներից արյունարբու Ջամալ փաշայի թոռ Հասան Ջամալը:

Թուրքական T24 կայքում հրապարակած հոդվածում, դիմելով Էրդողանին, Հասան Ջամալն ասել է, որ «առանց արյուն թափելու այդ գործը չի իրականանա»:

«Եթե մի մարդ սահմանափակում է մամուլի ազատությունը…խաղում է Թուրքիայի ճակատագրի հետ…Թուրքիան մտցնելով մերձավորարեւելյան ճահիճը, պոկում է քաղաքակիրթ աշխարհից…նախապես է կազմում պատգամավորների ցուցակները… հանձնարարություններ է տալիս արդարադատությանը եւ ուզած որոշումը ստանում…վերացնում է ժողովրդավարության ճանապարհին Թուրքիայի բոլոր ձեռքբերումները…Դա հեշտությամբ չի կարող լինել: Առանց արյուն թափելու դա չեք կարողանալու իրականացնել», -Էրդողանին ուղղված խոսքում ասել է Հասան Ջամալը: