Հակոբ Հակոբյանը (Ճոյտ) չի՞ վճարել իր շտաբի աշխատակիցներին

Երեւանից Էջմիածին տանող մայրուղու վրա այսօր մի քանի տասնյակ կին էին հավաքվել։ Նրանք թիվ 19 ընտրատարածքում ԱԺ պատգամավորության թեկնածու Հակոբ Հակոբյանին պատկանող հյուրանոց-խաղատան դիմաց նրան էին սպասում։

«Աշխատանքի դիմաց փող են, չէ՞, տալիս։ Բոլոր շտաբները տալիս են։ Հիմա մեր աշխատավարձն ենք պահանջում, ուրիշ ոչ մի բան»,- ասացին նրանք։

Կանայք, որոնք խնդրեցին չլուսնկարահանել իրենց, պատմեցին, որ առաջին անգամը չէ, որ ընտրությունների ընթացքում օգնում են Հակոբ Հակոբյանին եւ դրա դիմաց վարձատրություն էին ակնկալում։

«Ասինք՝ գնանք, տեսնենք՝ ի վիճակի ա էսօր տալու, թե չէ։ Տաս օր հետո կտա, ոչ մի պրոբլեմ չկա, մենք ոչ մի պրոբլեմ չունենք պարոն Հակոբյանի հետ»,-ասաց մեկ այլ կին։

Մեզ հաջողվեց հեռախոսով կապ հաստատել Հակոբ Հակոբյանի հետ եւ նրանից այսօրվա դեպքի հետ կապված որոշակի պարզաբանումներ ստանալ։

«Վարձատրություն կոնկրետ, որպես այդպիսին չկա, ի՞նչ վարձատրության մասին ա խոսքը։ Հիմա մարդիկ օգնել են, սպասում են՝ ինչ-որ մի բան ասենք իրենց, ինչ-որ մի բանով օգնենք։ Ցանկացած մարդ կարող է գալ, ես չեմ բացակայում, որպեսզի էդ մարդիկ գան, արհամարհված չզգան, չասեն, տեսեք, մենք ինչ արեցինք, ինքը տեղում չի»,- ասաց պատգամավոր չընտրված թեկնածուն։

Հիշեցնենք, որ թիվ 19 ընտրատարածքում հանրապետական Հակոբ Հակոբյանի հետ ընտրապայքարում հաղթել է մեկ այլ հանրապետական՝ գեներալ Սեյրան Սարոյանը։

A1+