Ավանդների վերադարձման գործընթացը ՀՀ-ում ո՛չ տեղի է ունեցել և ո՛չ էլ, ըստ երևույթին, տեղի կունենա. Արթուր Գրիգորյան

ՀՀ աշխատանքի և սոցիալական հարցերի նախարար, ԲՀԿ-ական Արթուր Գրիգորյանը «Ժողովուրդ »-ի հետ զրույցում նշել է, որ պետական բյուջեն այս պահի դրությամբ չունի այնքան միջոցներ, որ կարողանա վերադարձնել ժողովրդի ավանդները: Անդրադառնալով ՕԵԿ-ի այն հայտարարությանը, թե իրենք երկու տարվա ընթացքում ՀՀ քաղաքացիների ավանդները վերադարձնելու են, նախարարն ասել է, «իրենք նախ առաջին հերթին մեր պետական բյուջեն պետք է քառապատկեն, տասնապատկեն, որից հետո նոր խոսեն ավանդների վերադարձման մասին»:

«Ժողովուրդ»-ի հարցազրույցը Արթուր Գրիգորյանի հետ ներկայացնում ենք ստորև.

-Պարոն Գրիգորյան, «Օրինաց երկիր» կուսակցության առաջնորդ Արթուր Բաղդասարյանն իր ողջ քարոզչության ընթացքում հայտարարում էր, որ իրենք երկու տարվա ընթացքում վերադարձնելու են բոլորի ավանդները: Որպես աշխատանքի և սոցիալական հարցերի նախարար՝ խնդրում եմ ասեք, ՀՀ պետբյուջեն այդքան հնարավորություն ունի՞ ժողովրդի ավանդները վերադարձնելու համար:

-Ավանդների վերադարձման գործընթացը Հայաստանի Հանրապետությունում ո՛չ տեղի է ունեցել և ո՛չ էլ, ըստ երևույթին, տեղի կունենա: Այս պահին գոյություն ունի ընդամենը ավանդների փոխհատուցման գործընթաց, որը գործում է 2005 թվականից: Սա շատ կարևոր բան է, որը պետք է տարանջատենք մեկը մյուսից: Երկրորդը՝ ավանդների վերադարձ՝ նշանակում է, որ ՀՀ բյուջեն պետք է առնվազն 10 միլիարդ դոլարին համարժեք դրամ ունենա, որպեսզի ամբողջությամբ ավանդները վերադարձնի: Սակայն, ինչպես բոլորին է հայտնի, մեր պետական բյուջեի հնարավորությունները բավականին սուղ են, այն ընդամենը 2,5 միլիարդ դոլարի սահմաններում է: Հիմա, թե որ քաղաքական ուժն ինչպիսի հայտարարություններ է անում, որ ավանդները կվերադարձնենք, դա ընդամենը քաղաքական մանիպուլիացիաներ են:

-Այսինքն՝ ՕԵԿ առաջնորդ Արթուր Բաղդասարյանը ժողովրդին կրկին խաբու՞մ է՝ տրվող սին հույսերի միջոցով փորձելով քաղաքական հաջողությունների հասնել:

-Գիտեք ինչ, արդեն բոլորին է հայտնի, որ ավանդի վերադարձ Հայաստանի Հանրապետությունում չի կարող լինել: Ընդամենը յուրաքանչյուր տարվա պետական բյուջեով 1,7 միլիարդ դրամի սահմաններում ավանդների փոխհատուցում ենք կատարում անապահով ընտանիքներին: Իրենց կողմից արված հայտարարությունները, առաջարկություններն ամբողջությամբ այսօրվա մեր պետական բյուջեի հնարավորությունների սահմաններից դուրս են:

-Այդ դեպքում ինչ պետք է անեն ՕԵԿ- ականները, որպեսզի կատարեն իրենց խոստումները՝ ավանդները վերադարձնեն խոստացված ժամանակահատվածում:

-Իրենք նախ՝ առաջին հերթին, մեր պետական բյուջեն պետք է քառապատկեն, տասնապատկեն, որից հետո նոր խոսեն ավանդների վերադարձման մասին:

-Քարոզչության շրջանակներում ՕԵԿ առաջնորդը հայտարարեց նաև, որ իրենք այնպես են անելու, որ ՀՀ յուրաքանչյուր քաղաքացու նվազագույն աշխատավարձը դառնա 60 հազար դրամ ոչ պակաս: Ձեր գնահատմամբ՝ դա հնարավո՞ր է:

-Այդ բոլորը կապված է մեր պետական բյուջեի հնարավորությունների հետ: Նախ և առաջ պետք է ոչ թե խոսեին նվազագույն աշխատավարձի բարձրացման, ավանդների վերադարձման մասին, այլ պետք է ասեին, թե ինչ միջոցներ, ինչ քայլեր պետք է իրականացնեն, որպեսզի մեր պետական բյուջեն հարստանա: Այս դեպքում հետևությունները թողնում եմ ձեզ:

-Իսկ ինչպե՞ս եք գնահատում Ազգային ժողովի մայիսի 6-ի ընտրությունները: Ձեր ակնկալիքներն իրականացա՞ն:

-«Բարգավաճ Հայաստան»-ը կխոսի դրա մասին, այս պահին ես չեմ ցանկանում որևէ հայտարարություն անել, քանի դեռ կուսակցության կողմից չի եղել պաշտոնական հայտարարություն:

-ԲՀԿ առաջնորդ Գագիկ Ծառուկյանը մինչև այսօր չի խոսել ընտրությունների արդյունքներից, միայն շնորհակալություն է հայտնել իր ընտրողներին, ինչո՞ւ:

-Երբ կհայտարարի իր գոհունակությունը, կասի, այդ ժամանակ մենք էլ մեր ասելիքը կասենք, այս պահին դեռևս ոչ մի բա չեմ ցանկանում խոսել: Ես որտեղ որ ընտրությունների ժամանակ պատասխանատու եմ եղել ընտրական գործընթացների եմ մասնակցել, որևիցե խախտման ականատես չեմ եղել:

-ՀՀԿ-ականները քննարկում են ԲՀԿ-ի հետ կոալիցիա կազմելու հարցը, Ձեր կուսակցությունն ի՞նչ դիրքորոշում ունի:

-Դա կուսակցության քաղաքական որոշում կլինի, դեռևս չկա նման որոշում, երբ կլինի այդ որոշումը, կհայտարարենք: Դեռ չենք քննարկել:

-ԲՀԿ-ն գո՞հ է մանդատների քանակից:

-Եկե՛ք «Բարգավաճ Հայաստան» կուսակցության գոհունակության կամ դժգոհության վերաբերյալ լսենք կուսակցության պաշտոնական հայտարարությունը: