Եմենցի մահապարտ ահաբեկիչը Մեծ Բրիտանիայի քաղաքացիություն ունի

ԱՄՆ Կենտրոնական հետախուզական վարչությանը տեղեկություն հայտնած ինֆորմատորը, որը հաղորդել էր, թե Եմենի «Ալ Քաիդայի» մասնաճյուղը ԱՄՆ օդանավակայաններից մեկում պատրաստվում է օդանավ պայթեցնել, Մեծ Բրիտանիայի քաղաքացիություն ունի, հաղորդում է Reuters–ը։

Բրիտանական MI5 և MI6 հատուկ ծառայությունները (արտաքին և ներքին հետախուզություն) կարևոր դեր են խաղացել ահաբեկչությունը կանխելու գործում։

CNN–ը, վկայակոչելով Սաուդյան Արաբիայի հատուկ ծառայություններին մոտ կանգնած աղբյուրներին, հաղորդել է, որ գործակալը ծագումով սաուդացի է՝  ծնված և մեծացած Եվրոպայում։ Կյանքի որոշակի ժամանակահատվածում վերջինս հետաքրքրություն է դրսևորել իսլամիստական գաղափարների նկատմամբ և սկսել է շփվել համապատասխան շրջանակների հետ, հայտնվելով Սաուդյան Արաբիայի հակաահաբեկչական ծառայությունների ուշադրության կենտրոնում, ինչից հետո էլ մոտ մեկ տարի առաջ հավաքագրվել է այդ կառույցի կողմից։

Բրիտանիայի անձնագիր ունենալու շնորհիվ ինֆորմատորին հաջողվել է հայտնվել «Ալ Քաիդայի» Եմենի մասնաճյուղի շրջանակներում և տեղեկանալ ահաբեկչության նախապատրաստման մասին։