Sukhoi Superjet-100 ինքնաթիռի վթարի պատճառների հետաքննությունը կտևի մեկ տարի

Ինդոնեզիայում վթարի ենթարկված ռուսական արտադրության Sukhoi Superjet-100 (SSJ-100) օդանավի վթարի պատճառների հետաքննությունը կտևի մոտ մեկ տարի, հաղորդում է Ռիա նովոստին՝ հղում անելով Ինդոնեզիայի տրանսպորտային անվտագնության ազգային կոմիտեին։ 

Բացի այդ, անհրաժեշտության դեպքում, այն կերկարաձգվի ևս երեք ամսով։

«Այդ ժամկետները սահմանվում են՝ ելնելով վթարի վայրի բարդ պայմաններից, ինչպես նաև հետազոտություններից՝ օդանավի բեկորների հավաքումից և հետազոտումից», – ասել է գործակալության զրուցակիցը։

Առայժմ փրկարարներին հաջողվել է հայտնաբերել միայն SSJ-100–ի բեկորների մի մասը։ Ենթադրվում է, որ վթարի ենթարկված ինքնաթիռի բեկորների մի մասը գտնվում է լեռան ստորոտում։ Օդանավում եղած ուղևորներից ողջ մնացած որևէ մեկը չի հայտնաբերվել, ինչպես նաև դեռ չեն հայտնաբերվել զոհվածների մարմինները։ 

Հիշեցնենք, որ SSJ-100 օդանավը ասիական վեց երկրներում ցուցադրական չվերթներ իրականացնելուց հետո և նույն առաքելությունն իրականացնելու նպատակով մայիսի 9-ին Ջակարտայի օդանավակայան մեկնելիս՝ դուրս էր եկել ռադարների վերահսկողությունից և բախվել օդանավակայանից 59 կմ հեռավորության վրա գտնվող լեռանը։  

Օդանավում եղել է 44 մարդ, որոնցից 8-ը անձնակազմի անդամներն էին։