Արամ Սարգսյանը չի բացառում ՀԱԿ-ից դուրս գալու հեռանկարը

Հարգարժա՛ն լրագրողներ,

Նախ ուզում եմ շնորհակալություն հայտնել իմ հրավերին արձագանելու համար և խնդրել, որ այսօր պահպանենք ճեպազրույցի ձևաչափը ու իմ քաղաքական հայտարարությամբ ավարտենք մեր հանդիպումը:

Ինչպես գիտեք, ես ասել էի, որ ՀԱԿ-ի խորհրդարան անցնելուց հետո հրաժարվելու եմ մանդատից և հիմա պաշտոնապես հայտարարում եմ, որ վայր եմ դնում ԱԺ պատգամավորի իմ մանդատը և հաջողություն եմ մաղթում ՀԱԿ-ին առաջիկա խորհրդարանական գործունեության մեջ:

Կանխելով ձեր հարցադրումները՝ հայտարարում եմ նաև, որ առաջիկայում կուսակցության ակտիվի հետ քննարկվելու է ՀԱԿ-ի հետ մեր հետագա համագործակցության ձևաչափը: Չի բացառվում նաև ՀԱԿ-ից դուրս գալու հեռանկարը:

Անցած ժամանակահատվածում մենք ունեցել ենք տարաձայնություններ ՀԱԿ-ի գործունեության վեկտորների, ներքաղաքական զարգացումների, արտաքին քաղաքական դիրքորոշումների շուրջ, որոնց մասին ազատորեն բարձրաձայնել եմ իմ կարծիքը:

Լինելով թիմային գործունեության մարդ, չկարևորելով սեփական հավակնությունների հաստատումը՝ ես արել եմ հնարավորը ընդհանրական հաջողության համար:

Խորապես համոզված եմ, որ մենք բոլորս արժանի ենք բոլորովին այլ Հայաստանի, քան ունենք:

Կուսակցության անդամների, քաղաքացիական հասարակության ներկայացուցիչների, շահագրգիռ անձանց հետ քննարկումներից հետո «Հանրապետություն» կուսակցության առաջիկա համագումարում ծրագրային ելույթով կներկայացնեմ մեր պատկերացումները նոր Հայաստանի և մեր անցնելիք ճանապարհի մասին:

Շնորհակալություն

Արամ Սարգսյան
«Հանրապետություն» կուսակցության նախագահ