Երևանում համերգով հանդես կգա հանրահայտ «Ակլարդեոն» դուետը

Մայիսի 12-ին, ժ.19.00-ին, Կոմիտասի անվան Կամերային Երաժշտության Տանը «Արվեստների պատկերասրահ» երաժշտական փառատոնի շրջանակներում տեղի կունենա «Ակլարդեոն» դուետի (Ռուսաստանի Դաշնություն) համերգը: Դուետը ներկայանում է Եվգենի Վարավկո կլարնետ և Մարիա Վլասովա ակորդեոն կազմով:

Ծրագրում՝ Գ.Ֆ.Հենդել, Ն.Պագանինի, Ֆ.Լիստ, Ֆ.Բուզոնի, Ֆ.Լիպս, Յ.Վիդման, Մ.Բրոններ, Ե.Պոդգայց, Գ.Կասադո, Գ.Բեյթելման, Գ.Կոննեսոն, Կ.Էսկեշ, Գ.Պերնե, Պ.Սարասատե, Ն.Բալդերու։ 

12 տարեկան հասակում արժանանալով Պատանի երաժիշտների համառուսաստանյան մրցույթի երկրորդ մրցանակին`Եվգենի Վարավկոն շարունակում է ուսումը Չայկովսկու անվան պետական կոնսերվատորիայում (Վ. Պետրովի դաս.): 1999-2001թթ. անցնում է աշխատանքի որպես մենակատար կլարնետահար` Մոսկվայի Ակադեմիական Սիմֆոնիկ Նվագախմբում Պավել Կոգանի ղեկավարությամբ: 2001-ից շարունակում է ուսումնառությունը Փարիզում` առնչվելով ֆրանսիական դպրոցի լավագույն ավանդույթներին (Էկոլ Նորմալ, Գի Դեպլյուի դաս.): Մասնակցել է բազմաթիվ հեղինակավոր փառատոների Ֆրանսիայում, Ռուսաստանի Դաշնությունում, ԱՄՆ-ում, Էստոնիայում: Երաժշտական նախասիրությունների, կատարողական ոճերի լայն ամպլիտուդը Վարավկոյին թույլ է տալիս ընդգրկվելու տարբեր նախագծերում, հանդես գալու որպես բազմակողմանի երաժիշտ: Դրանցից մեկը «Ակլարդեոն» դուետն է ակորդեոնահար Մարիա Վլասովայի հետ: 2011-ից Գնեսինների անվան Ակադեմիայի պրոֆեսոր է:

Տաղանդաշատ ակորդեոնահարուհի Մարիա Վլասովան նոր սերնդի փայլուն երաժիշտներից է: Ծնվել է Վլադիրմիրում, 1999-2004թթ.սովորել է Մոսկվայի Գնեսինների անվան անվան երաժշտական ակադեմիայում պրոֆ.Ե.Լիպսի դաս.Մի շարք հեղինակավոր միջազգային մրցույթների հաղթող և դափնեկիր է:

Երաժշտի կատարողական ոճին ներհատուկ է մատուցվող նյութի խորությունն ու պատկերների փիլիսոփայական մեկնաբանությունը,մատուցման ամբողջականությունն ու կատարողական փայլուն մաներան: Մենահամերգներով շրջագայել է բազմաթիվ երկրներում` Իսպանիայում, Շվեյցարիայում, Դանիայում, Լեհաստանում, Անգլիայում, ԱՄՆ-ում, Գերմանիայում, Չինաստանում և այլուր: Այժմ հանդիսանում է Մոսկվայի Ֆիլհարմոնիայի մենակատար, “oBAYANie” և “Rendez-vous …” միջազգային փառատոների գեղարվեստական ղեկավարն է: