«Ոսկե Ծիրան»–ի այս տարվա ժյուրիի նախագահն իսպանացի կինոռեժիսոր Վիկտոր Էրիսեն է

Մշակույթի նախարարությունում այսօր նախարար Հասմիկ Պողոսյանը, ՎիվաՍել-ՄՏՍ-ի գլխավոր տնօրեն Ռալֆ Յիրիկյանը, «Ոսկե Ծիրան» երևանյան միջազգային կինոփառատոնի տնօրեն Հարություն Խաչատրյանը, փառատոնի ծրագրերի տնօրեն Միքայել Ստամբոլցյանը և փառատոնի գեղարվեստական տնօրեն Սուսաննա Հարությունյանը հանդես եկան համատեղ մամուլի ասուլիսով` նվիրված «Ոսկե Ծիրան» երևանյան միջազգային կինոփառատոնին: 

«Ոսկե ծիրան» 9-րդ երևանյան միջազգային կինոփառատոնը տեղի կունենա 2012թ. հուլիսի 8-15-ը: Այս տարի փառատոնն ստացել է 1120 հայտ (անցյալ տարի' մոտ 700 հայտ) աշխարհի շուրջ 70 երկրից։

Այս տարի փառատոնի ժյուրիի նախագահը իսպանացի հայտնի կինոռեժիսոր, 2010թ. Կաննի կինոփառատոնի գլխավոր ժյուրիի անդամ Վիկտոր Էրիսեն է: Երևանի' գրքի համաշխարհային մայրաքաղաքի հռչակման առիթով «Ոսկե ծիրան» կ/փ-ը 2012թ-ին կներկայացնի նոր ծրագիր' «Գիրք և կինո» խորագրով: Ծրագրում ընգրկվելու են հայ և համաշխարհային դասական ստեղծագործությունների էկրանավորումները:

Մրցութային ծրագիրը 2012թ-ին կպահպանի 4 մրցույթները' «Միջազգային խաղարկային», «Միջազգային վավերագրական», «Հայկական համայնապատկեր» և «Կորիզ». վերջինս մեկնարկել է 2011թ-ին և անդրադառնում է երիտասարդ կինոռեժիսորների կարճամետրաժ ֆիլմերին: Ֆիլմացանկով կներկայանան «Երևանյան պրեմիերաներ», «Հետահայաց ցուցադրություններ» և «Հարգանքի տուրք» ծրագրերը, որոնցում սպասվում են մի շարք անակնկալներ համաշխարհային կինոյի վարպետներից: Մասնավորապես՝ «Հարգանքի տուրք» ծրագրի շրջանակներում կիրականացվեն Յուրի Երզնկյանի 90-ամյակին («Յուրի Երզնկյանը և իր աշակերտները») և Ֆրունզե Դովլաթյանի 85-ամյակին նվիրված ցուցադրություններ: Հատուկ կարևորությամբ կնշվի Անդրեյ Տարկովսկու 80-ամյակը:

Փառատոնի շրջանակներում արդեն 6-րդ անգամ կկազմակերպվի «Ռեժիսորներ առանց սահմանների» համատեղ արտադրության ֆորումը, որը հանդիսանում է «Ռեժիսորներ առանց սահմանների» Արևելյան գործընկերության ծրագրի մի մաս և իրագործվում է Եվրամիության աջացությամբ:

Մինչև փառատոնի սկսվելը ծրագրվում է իրականացնել նաև «Կինոլրագրություն առանց սահմանների» խորագրով դասընթաց միջազգային բարձրակարգ մասնագետների և Արևելյան գործընկերության երկրներից ժամանած երիտասարդ կինոգետների, կինոքննադատների մասնակցությամբ: Վերջիններիս համատեղ ուժերով փառատոնի օրերին կտպագրվի «Ոսկե ծիրան» ամենօրյա պարբերականը: