«Միմոսն» իր ելույթ-անակընկալով խանդավառություն է պարգևել Տաջիկստանի հայ համայնքին

ՀՀ մշակույթի նախարարության աջակցությամբ «Միմոս» խամաճիկների թատրոնը ս. թ. ապրիլի 13-23-ը, «Մի գայլի պատմություն» ներկայացումով մասնակցել է Դուշամբեում կայացած «Տիկնիկների ֆանտազիա» 3-րդ միջազգային տիկնիկային փառատոնին' արժանանալով հանդիսատեսի, փառատոնի մասնակիցների հավանությանն ու թատերագետների բարձր գնահատականին: Այնուհետև, հայկական թատերախումբը սիրով և պատրաստակամությամբ փառատոնային ներկայացումով հանդես է եկել տեղի հայ համայնքի առջև, մատուցելով հատուկ անակընկալ. հմուտ տիկնիկավարների շնորհիվ՝ հայկական տարազով տիկնիկները պարել են ազգային պարեր և քոչարի բռնել:

Տաջիկստանի Հանրապետության պետական տիկնիկային թատրոնի տնօրեն Կ. Ի. Իբրահիմովի և Տաջիկստանի Մեսրոպ Մաշտոցի անվան հայ համայնքի նախագահ Հ. Ղազարյանի շնորհակալական նամակներն ուղղված ՀՀ մշակույթի նախարարությանը մեկ անգամ ևս փաստում են «Միմոս» թատերախմբի բարձր պրոֆեսիոնալիզմի, ներկայացման արժանիքների և հանդիստեսի խանդավառ ընդունելության մասին: