Մեկնարկում է հերթական երիտասարդական ծրագիրը

ՀՀ սպորտի եւ երիտասարդության հարցերի նախարարությունը Երևանի պետական համալսարանի շրջանավարտների եւ կարիերայի կենտրոնի հետ համատեղ իրականացնում է «ԲՈՒՀ-աշխատաշուկա. արդի կամուրջների հաստատում և փոխգործակցության ընդլայնում» խորագրով ու մի քանի փուլերից կազմված ծրագիրը, որը միտված է երիտասարդների և ձեռնարկությունների համագործակցության ամրացմանն ու փոխգործակցության նոր հնարավորությունների ստեղծմանը: Ծրագիրը երիտասարդներին այլընտրանքային տարբերակներ է ընձեռելու իրենց զբաղվածության խնդիրները լուծելու համար, բարձրացնելու է ուսանողների տեղեկացվածության եւ մրցունակության մակարդակը՝ ապահովելով նրանց մասնակցությունը պետական եւ մասնավոր հատվածում առկա կամավորական ու ինտերնշիփ ծրագրերին:

Երիտասարդական ծրագրի շրջանակներում կկազմակերպվեն թեմատիկ կլոր սեղան-հանդիպումներ, սեմինար-դասընթացներ, ինչպես նաև մասնակիցներին կներկայացվեն ոլորտում առկա միջազգային փորձն ու նորամուծությունները: Գաղտնիք չէ, որ ուսանողներից շատերը բուհն ավարտելուց հետո չեն ունենում համապատասխան փորձ եւ գործնական հմտություններ: Երիտասարդ մասնագետը պետք է պատրաստ լինի աշխատաշուկայի փոփոխվող պահանջներին, մրցունակ լինի ոչ միայն մասնագիտական, այլեւ անձնային բարձր որակների (հաղորդակցության հիմունքներ, թիմային աշխատանք, մոտիվացիա, ստեղծագործական մոտեցում, մշտական ինքնազարգացում եւ այլն) տեսանկյունից: Ծրագրի մասնակիցներին փորձառու մասնագետների կողմից մանրամասն ներկայացվելու են կարիերայի զարգացումը խթանող եւ խոչընդոտող գործոնները: Բացի դրանից' ծրագիրը նպաստելու է երիտասարդների աշխատանքային, մասնագիտական եւ անձնային մի շարք որակների զարգացմանը, բարձրացնելու է ապագա շրջանավարտների մրցունակությունը' աշխատաշուկայի մարտահրավերներին դիմակայելու համար, դիտարկելու է արդի աշխատաշուկայի հիմնական պահանջները և իրազեկելու է աշխատաշուկայի առաջատար գործատուների կադրային քաղաքականության մասին:

Երիտասարդական ծրագիրը նաեւ աջակցելու է ուսանողների ինքնադրսևորմանը, վերլուծական ունակությունների զարգացմանը, կարեւորելու է ուսանողի առաջնորդ լինելու և հասարակական ակտիվության գործոնները՝ նպաստելով թիմային ոգու բարձրացմանը եւ զարգացնելով թիմային աշխատանքի հմտությունները:

Հարկ է նշել, որ ծրագիրն իրականացվելու է 5 հիմնական փուլերով. առաջինը նախապատրաստական մասն է: Հետագա փուլերի ընթացքում կլինեն «Աշխատաշուկայի եւ բարձրագույն կրթության արդի փոխգործակցության խնդիրները» խորագրով գիտագործնական հանդիպում, թեմատիկ տարբեր ուղղվածություններով սեմինար-դասընթացներ եւ հանդիպում-քննարկումներ, բանավեճեր, «Կարիերայի կառուցման մեխանիզմներն ու աշխատաշուկայի պահանջները» խորագրով խորացված սեմինար-դասընթացներ, «Բիզնես ոլորտում իրականացվող բարեփոխումներն ու կադրային նոր քաղաքականությունը» խորագրով հանդիպում-քննարկումներ եւ այլն:

Ծրագրի թիրախային հիմնական խումբ են համարվում ուսանողներն ու նորավարտ շրջանավարտները, ովքեր ունեն հասարակական եւ/կամ քաղաքացիական ակտիվ մասնակցություն, հետաքրքրված են իրենց կարիերայի զարգացմամբ եւ պատրաստակամ են ամբողջ ծավալով մասնակցել ծրագրին:

Սեմինար-դասընթացին մասնակցելու համար անհրաժեշտ է լրացնել մասնակցության հայտը, որից հետո էլ կկատարվի բուն ընտրությունը: Այն իրականացվելու է 2 փուլով. առաջին փուլում ընտրությունը կատարվելու է հարցաթերթում տեղ գտած հարցերի պատասխանների հիման վրա: Այս փուլն անցած մոտ 100 ուսանող կմասնակցի մայիս ամսին նախատեսվող սեմինար-դասընթացներին, որոնց ընթացքում իրենց լավագույնս դրսեւորած երիտասարդներն արդեն կմասնակցեն «Կարիերայի կառուցման մեխանիզմներն ու աշխատաշուկայի պահանջները» խորագրով խորացված սեմինար-դասընթացներին:

Վերոնշյալ միջոցառումները լայն հնարավորություն կընձեռեն բուհ-աշխատաշուկա արդյունավետ եւ շարունակական համագործակցության ստեղծման, հետագա փոխգործակցության ընդլայնման համար, ինչպես նաեւ կնպաստեն ապագա շրջանավարտների անձնային եւ մասնագիտական որակների արտահայտմանը, ինչի շնորհիվ երիտասարդ մասնագետը առավել համարձակ եւ ինքնավստահ կլինի ՀՀ աշխատաշուկայում: