Մինսկի խմբի ամեն այցից հետո մենք ունենում ենք որոշակի կորուստներ. Վլադիմիր Կարապետյան

Երեկ երեկոյան ԵԱՀԿ Մինսկի խմբի համանախագահները ժամանել են Երևան։ Վերջիններս հայտարարել են, որ եղանակային վատ պայմանների պատճառով իրենց այցի շրջանակներում չեն լինի Ղարաբաղում, այլ անմիջապես կմեկնեն Բաքու։

ՀԱԿ արտաքին հարաբերությունների հանձնաժողովի անդամ Վլադիմիր Կարապետյանին խնդրեցինք մեկնաբանել, թե չի՞ կարելի արդյոք Ղարաբաղ չայցելելու փաստից հետևություն անել, որ իշխանությունները և միջազգային հանրությունը շարունակում են դուրս մղել Ղարաբաղը բանակցային գործընթացից՝ հակառակ իշխանության բազմաթիվ հայտարարություններին, թե ԼՂՀ–ին պետք է վերադարձնել բանակցային կողմի կարգավիճակը։ 

Կարապետյանը նշեց, որ մեկ այցից նման հետևություն անելը սխալ կլինի, բայց «այն, որ իշխանությունը ձախողվել է ղարաբաղյան հարցի շուրջ որևէ բան անելու գործում՝ մասնավորապես Ղարաբաղը բանակցային կողմ դարձնելու հարցում, դա փաստ է»։ Մյուս կողմից նա հիշեցրեց, որ համանախագահները մատնանշել էին եղանակային վատ պայմանները՝ որպես Ղարաբաղ չայցելելու պատճառ։

«Մենք ամեն այցից հետո ունենում ենք որոշակի զիջումներ, կորուստներ… Այս անգամ էլ դա դրսևորվեց «Չմիավորված երկրների շարժման»  հանդիպման ընթացքում, և կարծես ամեն գալուց մեր կողմից զիջելու գործառույթ են ունենում համանախագահները», – ցավով նկատեց Կարապետյանը։

Պատասխանելով լրագրողի հարցին, թե արդյոք դրա մեղավորը հայկական կողմի քաղաքականապես հասուն չլինելն է՝ ՀԱԿ անդամը դրական պատասխան տվեց։ «Սերժ Սարգսյանն ազատ և արդար ընտրություններ անցկացնելու իր խոստումը չկատարեց, ու համատարած, պետության կողմից կազմակերպված խախտումներով արձանագրությունները, իհարկե, կունենան իրենց հետևանքները Հայաստանի դիրքերի թուլացման վրա», – նշեց Կարապետյանը՝ հավելելով, որ ներքաղաքական իրավիճակը վճռորոշ նշանակություն ունի ԼՂՀ հարցում Հայաստանի դիրքերի ամրապնդման գործում։