Ինչո՞ւ է Պուտինը պաշտպանում Ասադին. Le Figaro

Ռուսաստանի նոր նախագահ Վլադիմիր Պուտինը շարունակում է օգնություն ցուցաբերել պաշտոնական Դամասկոսին, գրում է Le Figaro–ի հոդվածագիր Իզաբել Ռասսերը։ 

«Սիրիիայի ընդդիմադիրների պնդմամբ` այս տարվա ապրիլի 12-ին հաստատված հրադադարի ռեժիմից հետո սպանվել է մոտ 1000 մարդ։ Հաշվի առնելով այն, որ Ռուսաստանը երկու անգամ իրացրել է վետոյի իր իրավունքը ՄԱԿ-ի Անվտանգության խորհրդում քննարկվող բանաձևերի նկատմամբ, որոնցով դատապարտվում էին բռնություններն ու նախագահ Բաշար Ասադից պահանջվում էր հեռանալ զբաղեցրած պաշտոնից, պաշտոնական Մոսկվան պատասխանատվության իր բաժինն ունի այս սարսափելի հետևանքների հարցում»,-գրում է թերթը։ 

Հոդվածագիրն ընդգծում է, որ ի հեճուկս որոշ դիվանագետների սպասումների, ռուսական դիրքորոշումը հավանաբար չի փոխվի, քանի որ Կրեմլը ձգտում է պահպանել ստատուս քվոն, ինչի համար ունի մի քանի պատճառ։ 

«Դիվանագիտական մակարդակում Պուտինն օգտագործում է սիրիական հարցը, որպեսզի ուշադրություն հրավիրի ռուսական նոր հզորության վրա։ Պաշտպանելով տարածաշրջանում Իրանի միակ դաշնակից պետությունը` ռուսական ղեկավարությունը բարդացնում է Թեհրանի միջուկային օբյեկտների դեմ ռազմական գործողությունները։ Վերջապես, կորցնելով Մուբարաքի Եգիպտոսն ու Կադաֆիի Լիբիան, Մոսկվան Ասադի միջոցով պահպանում է տարածաշրջանում իր վերջին դիվանագիտական լծակը»,- կարծում է հոդվածագիրը։

«ՄԱԿ-ում Սիրիայի նախագահին ընձեռած դիվանագիտական պաշտպանությունն ունի տնտեսական և ռազմավարական հիմքեր։ Սիրիայում զանգվածային հուզումների սկզբից ի վեր զինամթերքի մատակարարումը ոչ միայն դոլարներ է բերում, այլև ի չիք է դարձնում արևմտյան և արաբական երկրների կողմից կիրառված պատժամիջոցները»։